«Юрта дика чудар» яхача Ерригроссе проекта юкъе дакъа лоацаш я ГӀалгӀайче
ГӀалгӀайчен унахцӀенон Министерствос хьалхашка оттадаьча декхарах, республикерча наьха могашал лораеча профилактикан центро хьал а лоацаш, ГӀалгӀайче юкъеяхай «Юрта дика чудар» яхача Ерригроссе проекта. Хьалхара лорий болам дӀабихьар МагӀалбика кхален Южне. Из дӀахьош хиннараш бар республикан волонтёраш-лораш, МагӀалбикерча ЦРБ говзанчаша тӀахьожам а лоаттабеш. Цох дийцар «Сердало» газетага ГӀалгӀай Республикан унахцӀенон министерствон зарбан болх лелабераша.
Тайп-тайпара ха яьнна нах лорашка чакхбаьхар волонтёраша, берашкара боккхийча нахага кхаччалца ха яьнна бахархой бар уж.
«Оаха баркал оал МагӀалбикерча ЦРБ лорашта, из таро тхоашта цар яларах. Из чӀоагӀа эшаш, дика гӀулакх да, массанена пайданна а да. Тхона а ловра тхоашкара пайда юкъебахьа», - аьлар къонача лораша-лоӀамхоша.
