«Безамца книжкаш ле» яха ерригача Россе болам хьаллоацаш я вай республика
Укх бетта 12-ча денгара 18-ча денга кхаччалца дӀахьоргболча «Безамца книжкаш ле» яхача боккхача боламе, дакъа лоацаш хургба вай мохк. Дерригача къамашта юкъерча книжкаш совгӀата телача денна хетабаь хургба из болам.
Библиотекашта, ишколашта, хала боахкача дезалашта книжкаш телаш, дӀахьоргда из беркате гӀулакх.
«Вай къаман библиотеко хӀара шера хьаллоацаш, болам ба из. Ишколашкарча библиотекашта, керда книжкаш эшача, уж Ӏалашде аьттув боацачарна книжкаш телаш, дӀахьош хоза гӀулакх да из», - дийцар «Сердало» газетага культуран гӀулакхах йолча министерствон зарбан болх лелабераша.
Цу болама керттера декхар - книжкаш дешара, шоайла совгӀата телара нах тӀахьехар. Ерригача Россе моттигаш чулоацаш, болам ба из. Тайп-тайпарча балха моттигаша, цу хӀаманца лерхӀам лелабераша хьаллоацаргда из гӀулакх вай мехка. Книжкаш эшачунна керда книжкаш довза аьттув луш болам ба из.
