Молочанске хин турбаш меттаоттаеш, болх дӀахьоргба вай республико
Токмакски кхален моттигашта гӀо деш бола болх дӀабахьа лерхӀ укх шера вай республико. Молочанска Низова, Крупске, Спартански оалача урамашкара хин турбаш тоаеш, дикка къахьега деза. Из хоам «Сердало» газетага бир гӀишлой балхах йолча Министерствос. «Хин турбаш хувца езаш дола доазув 575 метрага кхоачаш да.
Цу балха лаьрхӀа дӀахьожадеш дола ахча – 2 млн 200 эзар сом. Цул совгӀа, дикка тоае езарех я бӀеха хиш дӀаухаш йолча моттига насосни станци. 5 млн совгӀа рузкъа да цу балхо дӀалоацар. Шевченко оалача урамера 3900 метрага кхоачаш бола никъ тоабе лерхӀ. Цу балха хьожаде лаьрхӀа ахча - 39 млн сом. Деррига дӀалаьрхӀача, 2024-ча шера Токмакски кхален моттигаш тоаеш дӀадахьа деза балхаш 46 млн 200 эзар сомага кхоачаш хул.
Белгалде деза, Токмакски кхале дӀахьоча балхашта тӀахьожам беш, вай мехкарча гӀишлой балхах йолча Министерствон кулгалхочун гӀонча волга. Кхален администрацен кулгалхошца бувзаме волаш, вай республикагара цига къахьегаш йолча тоабан кулгалдеш ва из. Болх дӀабахьа эшаш мел бола кхоачам болаш ба къахьегамхошка.
