«ТӀаргам» яха кагирхой кхетаче дӀахьоргья вай мехка
Маьцхали бетта 1-ча денгара 5-ча денга кхаччалца, вай мехка хургйолча «ТӀаргам – 2025» яхача Ерригача Россе кагирхой дешара XVӀӀ-ча кхетаче гуллургба боккхача мехкара кагирхой. Россе 54 моттигера 160 доакъашхо ва цига тӀавоагӀаргвараш. Царна юкъе хургба юкъарча балха тӀа хьинардараш, бизнесменаш, студенташ, ӀT-говзанчаш, гӀо деш лелараш.
«ЧӀоагӀа тоам беш да, вай мехкара кагирхой Россе юкъарча кхетаченашка дакъа лоацаш хилар, иштта дика хеташ тӀаэц вай мехка хьаьший а. Уж цецбаха а, царга дӀахьокха а вайга шортта да, хӀаьта пайданедараш дӀа-хьа эцар а дика гӀулакх да», - белгалдир вай мехкадас Келаматанаькъан Махьмуд-Ӏаьлас.
Мехкадаь зарбан болх лелабераша белгалдечох, укх шерарча кхетаче дакъа лаца ловш дехар чуденнараш 900 саг ва, дӀадахача шера хинначул 100 саг дукхагӀа. Яхьашка гӀолла болх дӀабихьа хьахержараш 160 саг ва, царна юкъера ахаш вай мехкахой болаш. «ТӀаргам – 2025» яхача кхетаче керда дешара оагӀув бовзийтаргба эггара керттерадараш юкъелоацаш: технологеш, туризм, бизнес, Даьхенцара безам чӀоагӀбар. Цун программа дукха хӀама чулоацаш хургья: гӀалашта юхера лекцеш, Маьтлоам тӀа бовлар, гӀаш лоаман моттигашка лелар. Иштта доакъашхой аьттув хургба Магасерча таьрахьашца дувзаденнарех йолча Академе деша, МЧС колледжо дӀахьоча кхетаченашка дакъа лаца. Дешара программаел совгӀа, культуран оагӀонца, салоӀамца дувзаденнараш юкъелаьцад цига: кхетама хьал гойташ дола ловзараш, спортацара яхьаш, экскурсеш, кхоллама оагӀонцара яхьаш.
Кхетаче чакхйоалача хана, кагирхоша гойтаргья моттигерча а федеральни а оагӀонашка гӀолла йоаржае йиш йола шоай проекташ. Грантех латтача яхьашка котбаьннараша 500 эзар сом ахча эцаргда, ганза беррига кхоачам - 4 млн сом рузкъа.
«Докъашхошта дагалаттар кхоачашдара тӀехьа дика моттиг хургья цу вӀашагӀкхетарах. БоаггӀача боараме шоай болх дӀабахьа, вӀаший бовза, пайдане хургдараш дӀа-хьа эца аьттув хилба кагирхой», - аьлар вай Мехкадас.
