Йоккха йоацача шахьарий, исторически моттигий хӏама тоадарах йолча кхетаче дакъа лоацаш ба вай мохк
Йоккха йоацача шахьарий, исторически моттигий хӏама ма хулла тоадарах йолча Xӏ Ерригача Россе кхетачен балха юкъе дакъа лоацаш ба, вай мехкара викалаш а. Москве дӏахьош я кхетаче. Вай мехкарча викалашта хьалхаваьнна вахар Наьсарен мэр вола Оздой Руслан ва.
«Шахьарера моттигаш меттайоалаярах, исторически тӏехьале лораярах болча федеральни оагӏонцара болх ба кхетачено чулоацар. Цига дакъа лоацаш ва Россе Паччахьалкхен кулгалхо Мишустин Михаил, цун гӏонча вола Хуснуллин Марат, Россе гӏишлошъяра балхех, ЖКХ оагӏонцарча гӏулакхех йолча министерствон хьалха латта Файзуллин Ирек, иштта боккхий архитектораш, проектировщикаш, мехкара цӏихеза говзанчаш.
Укх шера йоккхача кхетаче шахьара моттигаш тоаярах йола шоай проекташ йовзийтар региона шин шахьаро - Магас, Наьсаре», - йоах «Сердалога» мехкарча Паччахьалкхера бенача хоамо.
Белгалде деза, Наьсаре каст-каста ишттача проекташка дакъа лоацаш шахьар йолга. Цхьацца гӏа боаккхаш, хӏара денна шахьарерча моттигий куц эргадоаккхаш, бахархошта паргӏатагӏа хургдолча тайпара хувцамаш деш, тоалуш латт Наьсаре. Дӏадахача шерашка аьттув баларах, таханарча ханага хьежжа салаӏа моттигаш хилийта, ӏама гонахьара доазув дикка меттадоаладе, хувцамаш де йиш хилар шахьаре. Хӏаьта карарча хана Коталон Аллее къахьегаш боахк болхлой.
