ГӏалгӀайче хьалхарчарца я, итт шера баьхкача туристий дукхалга диллача
ГӏалгӀайчено хьалхарчарех цхьа моттиг хьалоац, мехка итт шера туристически даькъ тӀа ихача нахага диллача. Республика, дикагӀа йолча кхаьннена юкъейоагӀаш я, лакха толамаш гойтарах.
ГӏалгӀай Республикан Кулгалхочун, Паччахьалкхен зарбан болх лелабераша яхачох, республике хьаухаш бола туристаш пхезза дукхагӀа ба - 8,6 эзаргара 44,7 эзарга кхаччалца. Из таьрахь дӀахо айлуш да: карарча шера ахкан замах республике 75 эзар саг хилар, дӀадахача шера хинначул 5,8 дукхагӀа.
Ер шу чакхдоалаш, ГӏалгӀайче 130 эзар хьаьша тӀаийца йоал. Мехка кулгалхочо Келаматанаькъан Махьмуд-Ӏаьлас дувзаду уж толамаш лакха хилар, къаман проекта чудоагӀаш новкъостал лоаттадеш хиларца. ДукхагӀча даькъе из дувзаденнад «Туризм, хьаша тӀаэцара хьал» яхача программаца.
«Тахан вай гойт хьаьшашта цӀихеза лоамашкара гӀалаш, Ӏалама хозал. Вай хьакхолл таханарча дено дӀабехаш бола салоӀам. Хьакхоллаш я вай заман паргӀата, кхерам боаца салаӀара моттигаш, дегӀабоалабеш ба никъ, хьаллоац хьаьший цӀенош хьалдеш бола шоай доалахьара хӀама леладераш, иштта юкъарлон кхача кийчбеш йола моттигаш», - аьлар республикан кулгалхочо.
Белгалду, карарча хана ГӏалгӀайче болх беш я 34 лаьрххӀа йола туристически оагӀув. Туристаш тӀахьехара йола керттера моттигаш я культурно-исторически моттигаш гойташ яраш, тамашийна юкъерча бӀаьшерен архитектура, дарбан-унахцӀенон салоӀама моттигаш.
Цу тайпара мехка туризм дика дегӀайоагӀаш я. Карарча шера лаьрххӀа чӀоагӀбир наха бовзаш бола кхоъ керда никъ: гӀаш вахар къаьнарча Ахабоарзен чӀожерча Зем-ГӀаланга, Гаьл-ЧӀоже вахар, иштта Ушкорта оалачап лоам тӀа валар. Кхы кӀезига безам тӀабодаш яц, дика яьржа йола Ӏилман туризм.
