Гӏалгӏай мехка халкъа цхьоагӏон Ди дездеш, пайдане кхетаченаш дӏахьоргья
Гӏалгӏайче цӏайна хетаяь кхетаченаш дӏахьоргья, халкъа цхьоагӏон Ди дездеш. Ерригача республике гӏолла дӏахьоргья цу тайпара программаш, фестиваль. Цига бахархошта, хьаьшашта довзийтаргда мах бола къаман ӏадаташ. Эггара лоархӏамегӏа йола моттиг дӏалоацаш да, РФ къонача бахархошта лаьрххӏа паспорташ луш хилар, яхаш, дийцар Гӏалгӏайчен Паччахьалкхен «Сердало» газетага.
Дика цӏайна хетаяь программаш дӏахьоргья республикан дукхача моттигашка, цу юкъе спортивни оагӏув а йолаш. 15:00 даьлча Наьсаре берий театра даькъ тӏа Гӏалгӏайчен кхоллама тоабаша лаьрххӏа йола программа гойтаргья. Цига сцена тӏа яргья «Дека илли» яха кхалнаьха иллиалархой тоаба, «Гаргареи» яха ансамбль, «Дега оаз» яха фолк-рок-тоаба, иштта цӏихеза республикан Паччахьалкхен филармоне гӏазкхий хор. Наха гургда ашарий концерташ, къаман ашараш, къаьнара халхараш, цига белгалдоалаш хургда Россе халкъа цхьоагӏо, барт, доттагӏал леладеш хилар.
Цхьатарра цу концерта программашца дӏахьоргда Шолжа-Шахьаре салоӏама хьалаш, цига 14:00 даьлча денз 16:30 минот яллалца моттигерча культуран Цӏен хьалхашка хургья вай мехка къамий мах бола таронаш йовзийташ йола моттиг. Укхаза го таро хургья къамий культураш, цига начӏал долча говзанчаша шоай кулгаговзал гойтаргья, кулгашца хьакхолла йиш йола болх, иштта дӏахьоргда говзанча хьехамаш, говзал йовза безам болча наха. Цига иштта таро хургья къаман даарех чам баккха, мерза даараш дара говзал йовза, къаман ловзарашка дакъа лаца.
Магӏалбике «Юрт-Ганз» яха кагирхошцара фестиваль дӏахьоргья, цига спорта яхьаш хургья массейолча оагӏорахьа дӏахьош. Из цӏай дицлургдоацаш хоза хургда.
