Бахархой вахара хьал тоадара тӏехьа, Россе Президента белгалдаьраш кхоачашдеш ба мехка
Лоархӏамеча 30 проектага гӏолла, боккха болх дӏахьош, хоалуш, куц тоадергда вай мехка. Цу балха юкъе да коммунальни оагӏонцара кхоачамбоацараш юстардахар, керда ишколаш, цӏенош хьалдар, наха салаӏа моттигаш тоаяр. Россе Президента Путин Владимира чӏоагӏонца йоаржаеш йолча къаман программашка гӏолла, дӏахьош хувцамаш да уж. Вахарерча гӏулакхех йолча къаман проектага гӏолла, укх шера доккхий хувцамаш дергдараш 33 моттиг я.
«Къаьстта терко ергья коммунальни оагӏонца дувзаденнарашта. Укх шера 7 моттига хьал меттадоаладеш къахьега лерхӏ. Цу гӏулакха хьахьожадаьд 246,5 млн сом ахча. Гуш боацаш, бакъда наьха вахарера гӏулакхаш лертӏа хилар цунца дувзаденна болх ба из.
Илдарха-Гӏалий тӏа «Фусамаш» яхача проектага гӏолла керда гӏишлош хьалъе лаьрхӏа дӏаболабаь боккха болх ба. 2025- 2027 шераш чулоацаш болх ба из, хӏаьта таханарча дийнахьа 48, 5%-га кхоачаш кийча я моттиг, планах йоагӏар 47% мара йоацача. Йиллача ханага хьежжа дӏабодаш ба болх, укх шера эшаш дола ахча хьакъостадаьд. Цу проектага гӏолла 2026-ча шера 6,3 эзар кв.метр гӏишлош я хьалъе езараш. Дукхача гӏатех дола цӏа тоадара болх тахан 58%-га кхоачаш кийча ба. Проекта хӏама кегадала тарлуш хӏама дац. Иштта харцар кхерам болча цӏагӏара нах кхыча фусамашка дӏачубохийташ болх ба мехка дӏахьош. 2019-2025-ча шерашкара программа тӏехдика кхоачашъяьй ала йиш йолаш да. Юххьанца 5,5 эзар кв. метр моттиге 310 саг дӏа-хьа нийсве лаьрхӏа хиннабар, хӏаьта тахан 6,7 эзар кв. метр доазон тӏа 635 сага фусамаш ӏалашъе аьттув баьннаб вай»,- белгалдир вай мехкадас Келаматанаькъан Махьмуд-Ӏаьлас.
Иштта кхыйолча къаман проекташка гӏолла кхоачашде аьттув баьннарех дийцар республикан кулгалхочо. Унахцӏенон оагӏонца дувзаденнараш теркалде эттача, Чамалхара фельдшерско-акушерски пункт 100% - га кхоачаш кийча я, Ӏаьлий-Юртара амбулатори тоаеш бола болх 98% - а кхоачаш чакхбаьккха баьннаб. Маьцхали бутт чакхбалале кийча хила езаш я уж моттигаш. «Дезал» яхача къаман проектага гӏолла, ветераний Цӏа хьалдаьд мехка, иштта вахара оагӏонцарча моттигашка кулг тохаш, хувцамаш деш ба. Йиъ берий беш тоаеш, боккха болх чакхбаьккхаб республике, «Кагирхойи бераши» яхача программага гӏолла Магӏалбикера № 1 йола гимнази тоаяьй, Пхьилекъонгий-Юрта, Гӏажарий-Юрта, Галашка, Кердача Реданте йиъ ишкол хьалъеш латт. 94%-га кхоачаш болх чакхбаьккха баьннаб тахан Ӏарпенаькъан Ювсапа цӏерах йолча политехнически колледже.
Федеральни оагӏонца боккха болх дӏахьош хувцамаш да Наьсаре. Шахьарий моттигаш тоаярах йолча Ерригача Россе яхьашка шозза котало яккхарах, дикка хувцалуш латт Наьсарен куц. Укх шера цу яхьашка цӏаькха а котало кхачаро боккха аьттув лу вайна шахьарера моттигаш тоае.
Вай мехкадас теркалдечох, керттердар – РФ Президента Путин Владимира къоастадаь декхараш кхоачашдеш, цу оагӏонца соцам баьчча тайпара болх дӏахьош хилар да. Къаман проекташка гӏолла хинна хувцамаш; бахархошта гуш, теркалдеш хила деза. Паччахьалкхен Кулгалхочо тӏадиллад, деррига балхаш боаггӏача боараме, цхьаккха кхоачамбоацар доацаш дӏахьош хилийта, аьнна, духхьал каьхаташ тӏа белгалдаь ца ӏеш. Цунга хьежжа, балхаш юххьанца къоастаяьча хана чакхдаьха, тӏехдика хила деза. Ахча доадар доацаш, наха паргӏато еш, вахара хьал аттача доаккхаш хила еза уж моттигаш. Моллагӏа тешаме доаца хӏама, кхоачамбоацараш хоаденна моттиг хуле, бахьанаш цу сахьате гучадаха, дерригга лертӏача доаккхаш къахьега деза. Къаман проекташ йоаржаяр цхьаккха духьале йоацаш, дӏадодаш дола рузкъа «нийсача» наькъ тӏа доадеш, болх тӏехдика чакхбаьккхалга бӏаргагуш хила деза.
