«Украинера тIемах байдда нах тIаэца, кийча ба вай мохк. Луганскери Донецкери шоай фусамах беха арабаьннача наха, чубаха моттигаш кийчъяра тIехьа, штаб вIашагIъеллай Мехкдаь амарца», — аьлар Мехкдаь пресс-службе.

ТIемо вахарах бохабаьча наха, бIайха буа кхача лоаттабергба, цул совгIа, дIа-хьа баха машенаши, лорийи, психологийи новкъостал а хургда. Вахача сага хьалхарча юхьанца эшаш мел долчун а, кхоачам бергба бехача наха. Шоай болх дIахьош хургба волонтераш а.

Хьабаьхкача наха духьала ухаш, уж шо-шоай моттигашка дIанийсъбергба цар, эша хIамаш дIаекъаргья. Беха нах вайцига хьачубоагIаргба аьнна, баь хоам бац таханарча дийнахьа, бакъда, хьал хувцаденна моттиг отте, царна эша кийчам болаш ба. Луганскери Донбасери арабаьннача наха лаьрхIа, хIамаш вай республико дIаяхьийтай Ростове.