«Монокристалл» яхача заводе, вай Мехкдаьга хьахьекхар хьадеш латта тамашийна дола сапфирови кристаллаш. Уж дIа-хьа кхухьийт дуккхача мехкашка. «Мастер» яхача региональни парке, ма даггара, хьаеш латт машенашта тIехьатувса прицепаш, тайп-тайпара турбаш, иштта кхыдараш а. ЛоархIаме меттиг дIалоацаш яр бахархошта, салоIаш ха дIаяхьа, тоаяь пхьера моттигаш. Кердача куцаца ший бахархошта духьала эттарех я, «Российский» оалаш йола микрорайон. Цар дIабихьача белха лакха мах оттабеш, Келматанаькъан Махьмуд-Iаьлас дийцар, вай республике хьайийлача кIала кластерах, иштта хьоахадир, тIехь-тIа йоагIача хана хьалъйотта лерхIача светодиодни заводах.

Соцам бир, шаккхе субъекто, вIаши бувзам лелабеш дIадахьа дезалга, уж беркат доаржадеш, экономика тоаеш дола гIулакхаш. Мехкдас белгалдир, республике юртбоахама хьал лакхача боарам тIа соцаде аьттув баьнналгах, тахан беззача тайпа бола дулха кхоачам регионе болга. Цул совгIа, Россе моллагIа йолча субъекте из беркат дIадахьийта а аьттув ба. Таханарча дийнахьа, керттерадарех да, лакха говзал йола болхлой цу гIулакха лахар. Ставрополерча Аграрни университете, вай къаман нах дешаш хилча, дика хургда аьнна хьоахадир. «Уж санна дола хаттараш йоккха кхетаче яь ца а дувцаш, тахан санна деррига цхьана доашхаш дийцача дикагIа хул», — аьлар Мехкдас. Ставрополерча губернатора дийцар, гIалгIай мохк, шоай беркате доттагIа волаш хьабоагIалга. Белгалдир, юкъера бувзами барти дIахо а чIоагIъбеш дIабахьа безалга. Таханардар санна дола вIашагIкхетар, боккха пайда беш хул аьнна, соцам бир. «Тхона цхьацца, вIаши беркате хургдола декхараш тIадехкад Келматанаькъан Махьмуд-Iаьлас. Дог тийша ва со, дIахо а иштта, пайдане бола бувзам болаш деррига дIагIоргхиларах», — аьлар Владимиров Владимира.