Вай спортсменаш котбаьлар, Владикавказе дӏахьош хиннача яхьашка
Эллиной-румий спортивни латара яхьаш дӏайихьар Владикавказе, Россе цӏихезача тренера Гучмазов Роберта сийлен еш йийлла яхь яр из, яхаш, дийцар «Сердало» газетага ГӏР спортивни латара Федераце.
«Шоай балха говзал гойтар Гӏалгӏайчера, Селий мехкара, Нохчий мехкара, Къилбаседа-Хӏирийчера, Гӏабартой-Балкхарой, Черсий-Къарший мехкашкара, Краснодарера, Ставрополера, Астрахански областера, Гуржегӏара, Казахстанера венача 8-14 шу даьннача 400 совгӏа спортсмена. Гӏалгӏай сборнена чубоагӏаш бар Балай Мухьмад (41 кг), Йовлой Мухьмад-Саид (51 кг), Мержой Билал (75 кг), царех чемпионаш хилар.
Иленаькъан Мехьди (45 кг), Хьаьшанаькъан Абубакр (45 кг) кхоалагӏча моттиге хилар»,- аьлар хоамо.
Тхога хоам баьчо яхачох, Владикавказе дӏахьош хиннача яхьашка кийчо яьраш бар гулъяьча тоабан тренераш Хамхой Ислам, Йовлой Ӏусман, Йовлой Заьлмаха.
