Гӏалгӏайчен латархой Россе цӏерах дакъа лоацаш хургба, Лас-Вегасе U-23 дунен Хьалхале къовсача
Гӏалгӏайчера «Ади Ахьмад» спорта клуба доакъашхой Бӏарахой Мухьмад, Ӏарпенаькъан Рамзан 23 шу даьннача спортсменашта юкъе Дунен Хьалхале къовсача Россе тоабанна чубоагӏаш ба. Керттера кагирхой дунен яхь дӏахьоргья Лас-Вегасе (США) ардара бетта 12-18-ча деношка.
Гӏалгӏайчен спортивни латара Федераце «Сердало» газетага ма аллара, U-23 къаман тоабанна чубоагӏаш ба вай мехкахой, эллиной-румий латара тоабан тренер Тотров Рустам ва. Гӏалгӏайчен ишкола викалаша дакъа лоацаргда цига, 72-82 кг дозал долаш. Яхьаш дӏайолалургья лаьрххӏа йола программа хьаелларца, уж хургья къовсама хьалхарча деношка, ардара бетта 12-14 деношка.
U-23 дунен Хьалхале къовсар дикагӏа йола кагирхой дунен яхьаш лоархӏаш я. Къонача спортсменашта уж я керттерча наькъ тӏа балара йола таро, цига царна мах баь варгвоацача чӏоагӏагӏа болча спортсменашца латара говзал ӏомаю.
«Ади Ахьмада» клуба ши спортсмен цига вахар дувзаденна да, халкъашта юкъерча спорта даькъ тӏа гӏалгӏай спортсменаш дика кийчо яь хилар.
