Гӏалгӏайчен шоай лоӏаме кӏалкхетаргах латараш, толамаш даьха баьхкар Шалажерча яхьашкара
Долакха-Юртарча спортсменаша дика толам баьккхар мехкашта юкъерча шоай лоӏамеча латарах йолча яхьашка. Уж хилар Шалажи яхача нохчий юрта.
«Яхьаш дӏайихьар аьтинга бетта 6-7-ча деношка, берий Ди дездеш хиларца дувзаденна. Начӏал долча кагирхошта юкъе бар 2009-2016 шерашка баьраш. Цига дакъа лоацаш хилар Долакха-Юртарча берий-ондаргий спортивни ишколе ӏомалураш. Царца вар Гӏазакханаькъан Расул, Манкенаькъан ӏаддал-Рахьман, Гаркхой Адам, Осменаькъан Мансур, Коазой Мухьаммад, Шакренаькъан Хьамзат. Цар хьалхара моттиг яьккхар. Зурабанаькъан Хьамзата, Шовхаланаькъан Ахьмада, Тоачанаькъан Амира, Баркинхой Ювсапа шоллагӏа моттиг яьккхар. Шакренаькъан Мусас, Манкенаькъан Адама борза совгӏаташ даьхар. Уж берригаш кийчбаьраш вар тренер Гаркхой Шамал», - аьлар ДЮСШ.
