Гӏалгӏайчен латархой Шолжа-Гӏалий тӏа дӏахьоча яхьашка котбаьлар
Гӏалгӏайчера эллиной-румий латара доакъашхой котбаьлар халкъашта юкъера йийлла ондаргий яхьаш дӏахьоча Шолжа-Гӏалий тӏа.
«Кхаь дийнахьа Нохчий республике хиннача къовсамашка бокъонца бола шоай гӏулакха говзанчаш хилар дӏагойтар цар.
«Беноерча Байсангура» клуба совгӏаташ даха яхьеяьлар Гӏалгӏайчен тоаба а. Шоай хьинар, низ, лоӏам гойташ; физически кийчо, латара говзал дика хиларах лакхара совгӏаташ даьхар Къоастой Асланбика (63 кг), Оздой ӏумара (67 кг), Мержой Билала (68 + кг), Балайнаькъан Мухьаммада (44 кг), Зангенаькъан Абдуллахӏа (26 кг), Къоастой Ибрахӏима (71 кг), Бӏарахой Мухьаммада (65 кг).
Шоллагӏа моттиг яьккхар Келаматанаькъан Хьамзата (55 кг), Йовлой Мухьмад-ӏаьлас (35 кг), Зангенаькъан Азраила (60 кг), Къоастой Рахьима (29 кг), Оздой Мухьмаммада (42 кг).
Борза совгӏаташ делар Ханкенаькъан Малика (60 кг), Бештой Зоврбика (82 кг), Белхарой Ислама (97 кг), Иленаькъан Махьдена (52 кг), Дадаевгӏар Рустама (35 кг)», - аьлар спортивни латара Федераце.
Тхога баьчо яхачох, цу яхье дакъа лацарах бехктокхаме вар ГӏР эллиной-румий латара кагирхой тоабан воккхагӏа вола тренер Хамхой Ислам.
