Гӏалгӏай футболист Хамхой Хазбулат укх наькъа а дикка белгалваьлар
«Мерани-Мартвили» яхача гуржий тоабанца ловзаш вола вай футболист Хамхой Хазбулат цӏаькха а дикка белгалваьлар. Из хоам «Сердалога» бир футболах йолча Федераце.
«Хьалхарча Лига Чемпионата 18-ча бӏале ловзаш хилар «Самтредиа», «Мерани-Мартвели» яха тоабаш. 2:1 йолаш, тӏехьарбараш котбоалаш чакхдаьлар ловзар.
Вай мехкахо Хамхой Хазбулат дикка белгалваьлар цу дийнахьа. Хӏама геттара эшаденнад аьнна хетача хана, тоабан гӏулакх кӏал ца дита аьттув баьлар цун. Хьалхарча даькъе «Самтредиас» чутехар бургац; бакъда, шоллагӏча даькъе «Меране», беррига низ ураоттабаь, ши бургац чутехар шоашца яхьебаьннарашта. 2:1 чот йолаш сецар ловзар», - йоах тхога бенача хоамо.
«Шоллагӏа ах ловзар юкъекхаьчача хана, шийх бӏубенна волаш, сабаре ловзар Хазбулат. Массанена хьалхашка дикка белгалваьлар из цу дийнахьа. Геттара кадай хила везача кхаьчача, мишта хьовза веза ховш вола футболист ше волга дӏахайтар цо», - дийцар тхога цу оагӏонцарча Федераце президента Хьулахой Хаважа.
