Аьшкапхьар волча Галай Адама ше аьшках хьаяьча гӏалай кӏаьд гойтар
Аьшках тайп-тайпара балхаш хьадеш волча цӏихезача мехкарча суртанча Галай Адама ше аьшках хьаяь гӏалаш гойтар наха. Бӏарчча шера къахьийгад пхьара, из болх чакхбоаккхаш. Хьалххе къоаламца диллача суртага хьежаш, хӏара хӏама кулгаца нийсдеш, тоадеш чӏоагӏа говза баь болх ба ала деза цох. Гӏалгӏай къаман исторе теш хинна латта кура гӏалаш дега сов гарга хиларо, къаман шира вахар довза безам хиларо ураоттадир автора дог .
«Цу тайпара болх чакхбаккха чӏоагӏа сабар, сатем эш, цул совгӏа цу гӏулакхаца лерхӏам болаш а хила веза, тӏаккха мара хьахургдац деррига ма хетта», - аьлар пхьара, «Сердалонна» интервью луш, Цисканаькъан Надияйга.
Галай Адам доккха начӏал долаш, аьшка пхьоал леладарал совгӏа, сурташ дехкаш, лаьттан тӏара моттигаш: сомий бешамаш, паркаш, царех тарра кхыяраш – кхоллаш вола дизайнер волаш, къахьегаш ва тахан. Массанена дезаденна да цун балхаш. Ший кердача проектех дийцар Адама, иштта теркалдир цу оагӏонцарча балха новкъарле еш дукха кхоачамбоацараш долга.
