ГӀалгӀайчен спортсмен котваьлар Селий мехка хиннача чемпионате
02.10.2023 10:37
Ший лоӀамеча латарах, «СССР Турпалхочун Абакаров Каде мемориал» яха Ерригроссе турнир дӀайихьар Селий мехка. Цу яхьа еза цӀи елар ГӀалгӀайчен спортсмена, яхаш, дийцар «Сердало» газетага ГӀалгӀайчен спортивни латара федераце зарбан болх лелабераша.
«Селий мехкарча Агвали яхача юрта ардара бетта цхьоалагӀча дийнахьа дӀайихьача чемпионате дошув даьккхар ЦӀолой Бабуле. Нохчашкахьара венача 97 кг дозал долча спортсменаца латаш вар из. Летача диазза котваьлар спортсмен: хьалхарча латаре чот 12:0, шоллагӀча- 6:1,кхоалагӀча -12:0, «туше» оала прием еш. Юххера латаш, гӀалгӀай спортсмено эшавир Селий мехкара Зиятдинов Омар чот 3:1 йолаш», - аьлар хоамо.
Белгалду, из Кавказа лоӀамерча латарах йолча яхьашта юкъе къаьнагIчарех йолга.
