Лакха толам гойташ ва, «Ади-Ахмад» яхача клубера БӀарахой ИсмаӀал
Россе яхьашка лакха толам гойташ хьавоагӀа, вай мехкахо БӀарахой ИсмаӀал. Омске дӀабихьача Россе боккхача яхьашка эллиной-румий латарах болча къовсаме белгалваьлар спортсмен. Из хоам «Сердалога» бир спорта гӀулакхех йолча Федераце болхлоша.
«Сибре дӀахьоча яхьашка, лакхерча лагӀа тӀа бала ловш, котбала гӀерташ, говзал гойташ хиннараш 500 совгӀа толашагӀа бола спортсменаш бар. Борза майдилг йоаккхаш белгалваьлар вай спортсмен», - дийцар тхога.
«БӀарахой ИсмаӀала, дӀахохьоча спорта наькъ тӀа пайдане хургдараш дукха хьаийцад аьнна хет сона цигара. Низ хиларал совгӀа, ший тайпара говзал, кӀоарга хьаькъал эшаш я спорт. Иштта йоккхача яхьашка кхоалагӀа моттиг яккхар а вай мехка лоархӀаме, дика да», - белгалдир республикан спорта хьалха латтача Белхарой Руслана.
