Бӏарахой Исмаӏал дунен Хьалхале яккхара яхьашка гӏоргва
Гӏалгӏай мехкарча «Ади-Ахьмад» яхача спортивни клубе ӏомалуш вола вай спортсмен дакъа лоацаш ва U-23 дунен Хьалхале яккхара яхьашка, уж дӏахьоргья ардара бетта 20-ча денгара 28-ча денга кхаччалца, Нови-Сад яхача Серберча шахьаре, аьлар «Сердало» газетага спортивни латара Федераце зарбан болх лелабеча Гӏаппархой Аишас.
«Селхан Россе гулъяьча тоабо эллиной-румий латарах дӏадихьача тохкама къовсамашка белгалбаьлар 23 шерга кхаччалца ха яьнна дикагӏбараш. Латара къовсамий чаккхе хилар Россе спортсменаш кийчбеча Москверча «Парамонова» оалача спортивни Центре, Бӏарахой Исмаӏала эшавир шийца латаш хинна Европан Хьалхале йолаш котало яьккха Байдусов Евгений, дозал 77 кг долаш. Чот хилар 5:2», - аьлар хоамо.
Исмаӏала латарга хьежача, Гӏалгӏай Республикан спортивни латара министра Белхарой Руслана белгалдир, дика а бехктокхаме а кийчо яь хилар бахьан долаш, Бӏарахой Исмаӏала таро хилар Дунен Хьалхален юкъе дакъа лоацаргдолча мехка тоабан мугӏарашка хила.
