Сурташ доахаш хиннача Котанаькъан Бекмарзий вахар
Котанаькъан Бейсолта Бекмарза ваьв Гӏалгӏай автономни областа чуйоагӏаш хиннача Яндаре 1934 шера. 1944 шера, из ший берригача дезалца мехкахваьккхар. Уж ӏобигар Каззахстане. Цар дезале ворхӏ саг вар: Бекмарзий пхи йиша, цхьа воша хиннад.
1955 шера цо яьхар «фотоговзал» яхача балхаца ювзаенна профессиональни курсаш. Гаргарча наха яхачох, шоаш бахача моттиге из цаӏ мара хиннавац сурташ доахаш, цун бийзаб ший болх. Тамашийна исторически экспонат-хьалхара селфи Котанаькъан Бекмарзас яьй 1955 шера, - из тахан Малсаганаькъан Т.Х. цӏерахча паччахьалкхен музее я. Музея гойтама юкъе я цун «Фотокор-1» яха сурташ доаха аппарат (из яьй 1930- 1940 шерашка Ленинграда заводе), иштта бинокла ботт.
Котанаькъан Бекмарза доккха начӏал долаш саг хиннав: цо геттара ший тайпара хоза локхар мерзаш дола пандар, къаман гӏирс – гӏалгӏай дахчан пандар.
1956 шера из хьалхарчарех цаӏ вар ший хьамсарча юрта Яндаре цӏавенарех. Йоархӏаш тӏаяьнна, тишъенна ше ваьха моттиг бӏаргаяйна, доккха халахетар хилар цунна. Иштта а бохам хиннача цун дега из ла маганзар: цо лаьцар кхайкор. Лазар а, психологически хьал а вӏашкаэттар. Котанаькъан Бекмарза кхелхар 1960 шера.
Из венначул тӏехьагӏа, цун хӏамаш къоастаеш нийсъелар царгий пхьара гӏирсаш чудола чемодан. Тӏаккха хайра цо царгий техника курсаш яьха хиннилга, хетаргахьа, из гӏулакх дӏахо дӏадахьа лаьрхӏа а хиннав из. Бакъда, цу хана, бохабаьчара юха мехкабаьннача гӏалгӏашта болх лаха, шоай вахар тоаде хала дар.
