ГӀалгӀай мехкара, Запорожски областа льархӀа, 2 эзар совгӀа книжка дохьийтаргда
ГӏалгӀай мехкара Запорожски областа Токмакски кхаленна АргӀанара гуманитарни мухь – 2 эзар совгӀа книжка дохьийтаргда, аьлар «Сердало» газетага ГӀалгӀай Республикан кулгалхочун зарбан болх лелабераша.
«Кийчдеш да дӀадахьийта Запорожски областа Токмакски кхален йоккхагӀча классашка деша дагӀача берашта лаьрхӀа дешара книжкаш. Дерригаш а, аргӀанара мухь хьоча хана, дӀадахьийта кийчдаьраш да 2 255 книжка, уж да тайп-тайпарча ишколашка Ӏомадеча Ӏилмаех: физикагара дӀадоладенна литературага, обществознанега, астрономега, кхычарга кхаччалца», - аьлар ший телеграм-оагӀон тӀа ГӀалгӀай кулгалхочо Келаматанаькъан Махьмуд-Ӏаьлас.
Цо яхачох, кастлуш ГӀалгӀайчено гӀо деча доазон тӀа эшаш дола книжкаш кхоачаргда, цар таро хулийтаргья шоашта ховр совдаккха, кхетам балара боарам лакхбе. ЙоккхагӀча классашка деша дагӀача берашта, уж чӀоагӀа эшаш да, хӀана аьлча уж экзаменаш дӀаяла кийлуш да. «Из вай декхар да - вай гӀо деш долча даькъ тӀара берий хьашт кхоачашдар. Вай царна хьалхашка бехктокхаме да», - аьлар Махьмуд-Ӏаьлас.
