Кхоллама жовхьар
Йийкар ишкола гимн
Вай мехка шиъ гимн я, наха сий деш, еза лоархӏаш. Уж ек байракх айеш, доккха цӏайш долча деношка. Россе гимн а Гӏалгӏай Республикан гимн а машарера дог-уйла долаш, Даьхе езаш хилар белгалдоаккхаш кхелла я. Цудухьа каст-каста хоз вайна уж нах вӏашагӏкхийттача, цар сийна ураотт адам. Дукха ишколаш я вай мехка, хӏара ишкола ший гимн хила еза аьнна тӏадожадаьдеце а, цар а хила йиш я шоай чухьара гимн. Цо хьагойт цу ишкола балха лостам, кхычарех тара хила ца гӏерташ, дешара даькъ тӏа кердадараш лехаш хилар. Вешта аьлча, гимн из цу ишкола тамагӏа да.
Дукха ха йоацаш ишкола директора сога аьлар:
- Вай чурча балха гимн язъе езар ӏа.
Со цкъарчоа озавелар цу дешах, могаргдий-те яха шеко дег чу карчарах. Хӏаьта а аьлар аз:
- Тамаш я сона из язъе моге... Хьожаргва со язъе, из мишта хургья-м хац сона.
Дукха ца говш яздаь, дӏаделар аз дешаш. Уж дар кхаь куплетахи хӏаранена тӏехьа оалача юхаалара (припев) дешаехи латташ:
«...Дешаро ӏомаву доттагӏа вовза,
Хьаькъала онда ву, кулгашта – говза,
Кӏерамаш хьалсега баьдеча новкъа,
Халонаш атта лá моллагӏча довкъа...»
Дикка ха яьлар, хӏама хьоа ца деш. Хӏаьта со ӏеваланзар цу дешаех фу хиннад ца хаьттача:
- Пайдана хиларий гимна дешаш?
Царна дукха раьза ца хинначох тара хийтар сона гимна кхел е езараш. Юха а дагадехар уж, дицденначара хьаийцар. Тӏаккха уж кхаьчар цӏихезача композиторга, йоккха говзал йолча иллиалархочунга а ашархочунга а Дзейтанаькъан Тимурага. Из кӏира шозза воагӏа ишколе, пхийтта саг ше хьа а хержа, ашарий лостамагӏа царца къахьегаш ва из.Уж дийшачул, дайзачул тӏехьагӏа композитора аьлар:
- Цхьа моттиг кӏеззига тоайича бакъахьа хургьяр.
Со раьза хилар цо яхачоа, эргабаьккхар мугӏ.
Хьехархой ди дар хьатӏакхоачаш латташ. Тимура актови зале ӏочувийхар со. Лаьрххӏа со ӏо а хоаваь, аьлар:
- Хӏанз хьай гимнага ладувгӏаргда ӏа.
Сцена тӏа ена хьаэттар са дешархо Муцолганаькъан Салима, из 7-ча классе дешаш я. Дӏааьлар илли.
- Езаеларий хьона гимн? Из цхьа марша хьисапе язъе а ца гӏерташ, лирически илле хьисапе кхеллай аз. Дукха-м лийлар со из йиш керта чу хьачу ца йоагӏаш, - аьлар ашархочо.
Гимн сона чӏоагӏа хоза хийтар. Композитора баркал аьлар. Геттара цецваьккхар со Салимай оазо. Кхычарна юкъе белгала йоацача цу йиӏига тамашийна хоза оаз хиннаяр. Цун начӏал хьалаха, хьагучадаккха хайнадар Тимура.
Тӏехьагӏо цо сога аьлар:
- Дукха къа-м хьийгар аз Салимайца, гимн иштта екийта гӏерташ.
Хьехархой ди долаш актови зале гулбеннача ишкола болхлошта хьалхашка эггара хьалха йийкар гимн. Цу дийнахьа е со е Тимур а балха хила дезаш дацар. Шоллагӏча дийнахьа беррига хьехархой тӏабаьхкар сона, баркал ала дагахьа. Царна а гимн езаенначох тара дар.
- Из деррига нийсденнад, - аьлар аз, -говзача композитора бехках, цо кийчъяьча къонача иллиалархочун Салимай бехках.
Дӏахо дӏадолхача деношка оаха кхаьнне а цхьана сурт даккха лаьрхӏар: композитора, дешай автора, Сурхо тӏарча ООШ къонача иллиалархочо. Цунга хьажа таро я шун а.
