Нах тӏаувза фусам
Шолжерча культуран цӏен 70 шу дизад
Укх шера нийсса 70 шу дуз, Шолжера культуран цӏа хьадича денз. Из хьаде-м 1948 шера доладаь хиннад, вай къам Сибре дигача хана, бакъда бокъонца хьалдаь даьнна, болх бе из доладеннад 1956 шера. Цу хана денз, 1999-ча шерга кхаччалца цхьаккха тайпара цӏенхашта из тоадеш балхаш даь хиннадац. Цу шера эггара хьалха, дуккха хӏама хувцаш, тоадаь хиннад из. Хӏаьта мехка доал де Келаматанаькъан Махьмуд-Ӏаьла хьатӏавеча, Гӏалгӏай паччахьалкхен 100 шу дизарца дувзаденна, шозлагӏа цӏенхаштта тоадир Шолжера культуран цӏа. Ала деза, Макшарипа Махьмуд-Ӏаьла ше Шолжера хиларах, къона волча хана цу культуран кхуврча тхов кӏалха гитара лакха ӏомалуш хиннав, аьнна.
Духхьал пенаш мара хӏама ца дуташ, чӏоагӏа тоадир цу наькъа дувцаш дола культуран цӏа. Цига къахьегаш хиннача «Евростроймонолит» яхача гӏишлонхой фирмо кораш, наӏараш, тхов, кхы а дукха хӏама хийцар ювцача моттиге. Цунна керте латташ вар Тиймарзанаькъан Яхььяй Ваха.
Шолжа кхале къона а къаьна а дукха нах шийна тӏаозаш йола моттиг я вай ювцар. Цу чу я боккхагӏчарна а берашта а йола библиотекаш, ашарий ишкол, 10 совгӏа бе-бе говзалаш ӏомаеш йола кружокаш, цу даькъе халхара, драматически, иллиалархой, тхах йийза хӏамаш хьаю, кхыяраш. Иштта наьха хьашташ кхоачашде вӏашагӏъелла концертни тоаба я цига болх беш, ӏадатий ишкол я. Цу ишколе дӏаязбу 8-10 классашка дешаш бола ондаргаш, царна хьалхашка лекцеш еш этнографаша, филологаша, дин викалаша.
Культуран цӏен кулгалхо я Матенаькъан Ӏаьлий Ӏашат. 40 шу совгӏа ха цо из болх бу. Доккхача таьрахьаца, культуран цӏен 70 шу дизарца, даькъалабувца лов цун болхлой, ерригача Шолжа кхален бахархой.
