СВО ветерана ший вахар дӏаходахьа гӏо деш ба мехка
Тӏема аренашкара ког боацаш цӏавена Инаркъанаькъан Заьлмаха волча баха хилар «Даьхен лорабой» яхача ганза мехкарча филиала болхлой. Заӏапхочун цӏенга хьежар комисси, вахарера гӏулакхаш кхоачашде аттагӏа, паргӏатагӏа хургдолаш малагӏа хувцамаш де деза техкар цар.
«Наӏара санагӏашта бустамаш доахаш, кхычахьа де деза хувцамаш белгалдеш, болх дӏабихьар цар заӏапхочун цӏагӏа. Дегӏа маьженаш лерттӏа болх беш цахиларах, тӏема доакъашхочун вахара хьал ма хулла аттачахьа даккха хьожаргба филиала болхлой», - йоах «Сердалога» цигара бенача хоамо.
Наӏара санагӏаш дикка дӏашердеш, кӏалхара кӏийле шаьръеш, дӏа-хьа лела новкъарле ераш юстардоахаш, кулг-юхь дулаш йолча моттиге кхыдола, чӏоагӏагӏа дола гӏирсаш оттадеш, иштта кхыдола хувцамаш деш, болх дӏахьоргба заӏапхочун цӏагӏа.
Заӏапхочунна лаьрхӏа йола хӏамаш оттаергья хӏара цӏагӏа, «Хьаькъале цӏа» яхача гӏирсашка гӏолла кхоачашде аьттув хургба цхьадола гӏулакхаш.
