Кердача Реданте цӏихеза говзанча Чуранаькъан Ювсап дагалаьцар
Гӏалгӏайчен Магӏалбика кхален Кердача Реданте «Кхоллам, хӏаман кеп» яха сайре дӏайихьар. Из хетаяь яр цӏихезача скульптора, кулгаговзалца хӏамаш хьаеш хиннача Чуранаькъан Ювсапа. Из дагалоаттама кхетаче вӏашагӏъеллаяр «Дешархошта культура» яхача Ерригроссийски проекта чуйоагӏаш, цига гулбелар культуран-салоӏама моттиге ӏомалураш, моттигера бахархой, говзанча начӏал дезараш.
«Хьасана Ювсапа ший хьамсарча мехка, шийна уллув хиннача наьха дегашка йоккха лар йитай. Цо дукха болх бир тха ДК, цу юкъа берашта дукха хӏама делар цо», - аьлар Кердача Реданта культуран Цӏен кулгалхочо Хоаной Марета.
Ювсапа кхоллама начӏал ший тайпара белгалдоалаш дар. Зӏамига волаш волавелар из ший начӏал гойта. Цу хана дижар цун дег чу кхоллама вахар, цул тӏехьагӏа цо мел вах а дӏабихьар из никъ.
Чуранаькъан Ювсапа вахара никъ аттачарех хиннабац. Цун дукха халонаш ла йийзар, бакъда уж яр аьнна из веха хиланзар. Моллагӏа халонаш нийсъяларах, цо ше хьалаьца никъ дӏахо дӏахьора. Шийна гонахьа хозале хьакхоллар, из вай тӏехьенга кхоачаш хулар. Цун балхаш тахан бокъонца йола искусствон ганз хинна дӏаэттар.
Шийна ховш дар деррига цо дӏалора ше ӏомаберашта. Дукха бар цун занятешка ухараш, цунгара говзал ӏомаераш.
Цун сийрда цӏи даим яхаргья новкъостий, из вовзаш хиннарий дегашка. Чуранаькъан Ювсапа кхоллам дӏахо а накъабоалаш хургба къонача ноахалашта шоай кхоллама никъ дӏахьош, цох бола дагалоаттам бахаргба цо хьакхеллача хозача искусствон балхашка.
