Хӏетта малхадаьнна бер меттадоаладе гӏерташ, 8 сахьат даьккхар лораша
Дегӏаца сакхат долаш малхадаьннача бер эттӏадеш баьхкар вай лораш. Республикерча бераш деча керттерча моттиге дӏабихьар из болх. Хӏетта малхадаьннача бера хьал чӏоагӏа во, кхераме дар – даа хӏама ӏочуцадохийташ 25 моттигера хьовзаенна латтар цун чураш. Царех 10 моттиг даа хӏама цхьаккха тайпара ӏочугӏоргдоацаш къовлаенна латтар, хӏаьта 15 моттиг мембранни оала духьале йолаш яр.
«Бер ханал хьалха малхадаьннадар 2, 25 кийла мара доацаш. Хирургашта хьалхашка эттар чӏоагӏа чоалхане болх бар: чураш хила еззача тайпара меттайоалаярал совгӏа, цар йӏоахал лорае езаш бар уж ма хулла. Операци дӏахьош 10 моттигера вӏашкахеттар цар уж. Даьла къахетамца 80 сантиметр йиткъиига чураш меттайоалае вӏаштӏехьадаьлар лакха говзал йолча лорий, из чӏоагӏа лоархӏаме дар кер боаггӏача боараме болх бе болалургболаш. Операци яьча кхоалагӏча дийнахьа, бер ше «арадаха» могаш хилар, цу гӏулакхо хьагойтар кер меттаэттилга. Итт бутт баьлча могаш долча беро санна хӏама дуаш дар из», - дийцар «Сердалога» мехкарча цу оагӏонцарча Министерстве.
Ӏалбаканаькъан Зарас доккха баркал кхайкадир шоай болх иштта дика чакхбаьккхача ерригача тоабанна, къаьстта хирурга Бохтаранаькъан Ибрахӏима. Министра белгалдир, ши кийла хиллал мара доацача, хӏетта малхадаьннача бера 8 сахьата операци еш бахкар лакха говзал эшаш хӏама долга. Хӏаьта эггара лоархӏамедар да, нийсденна сакхаташ меттадоаладарал совгӏа, кер ше хила беззача тайпара болх беш хилар.
Ӏалбаканаькъан Зарас белгалдир, лораша шоай болх тӏехдика дӏабихьалга.
