Кердача ишколашта тӀадолха наькъаш лакхача боараме тоадаь хургда
Эбарга-Юртарча № 6 йолча ишкола, Ӏаьлий-Юртарча гимназена тӀадолха наькъаш таханарча ханага хьежжа дика тоадаь хургда. Из декхар оттадаьд вай мехкадас Келаматанаькъан Махьмуд-Ӏаьлас наькъий гӀулакхех йолча Министерствон хьалхашка.
«Сердалога» из хоам бир республикерча Паччахьалкхено. «Цу оагӀонцара болх малагӀча боараме дӀабихьаб тахка араваьлар вай мехкада Келаматанаькъан Махьмуд-Ӏаьла. № 6 йолча ишкола тӀабода никъ тоабаь хила безаш ба, гуйран кхоалагӀа бутт хьатӀаотташ. Ӏаьлий-Юртарча гимназе тӀабода никъ, догӀан ха отталехь, кийча хила безаш ба», - йоах тхогарча хоамо.
Белгалде деза, дешара оагӀон вай мехка лакха терко лоаттаелга; кхувш латтача тӀехьен, хьехархой дешара моттигаш таханарча ханага хьежжа лакхача боараме хургйолаш дикка къахьегилга.
