Келаматанаькъан Махьмуд-Ӏаьла: Укх дено вай исторен хала оагӀонаш дагайохийт
ГӏалгӀай къам мехкахдаьккха 81-гӀа шу долаш, ГӏалгӀайчен кулгалхочо Келаматанаькъан Махьмуд-Ӏаьлас кхайкарал дир республикан бахархошка. Саькура бетта 23-гӀа ди, цо яхачох духхьал таьрахь хинна Ӏац, из да вай къаманга дена Ӏазапа ди.
«Укх дено дагайохийт исторен халагӀа йола оагӀонаш,1944 шера вай къам мехкахдаьккха. Халонаш тӀакхачарах ца дохаш, кхы а чӀоагӀагӀа барт болаш, диканга сатувсилга долаш хилар вай», - аьлар Келаматанаькъан Махьмуд-Ӏаьлас.
Къаман Кулгалхочо иштта белагалдир, мел йоккха халонаш вайна тӀакхачарах, вай деха хиннадац. Цул совгӀа, йоаяьяц вай культура, Ӏадаташ, мотт. ЦӀабаьхкачул тӀехьагӀа а гӀалгӀай шоай хиннача лаьтта юха баха Ӏохайшаб, меттаоттаяьй шахьараш, юрташ.
«Ер ди балан ди хинна ца Ӏеш, цхьоагӀон ди хилда, вай къаман низ, цхьоагӀо гойташ дола», - аьлар цо.
НизагӀа нохч-гӀалгӀай халкъ мехкара арадаьккха, цу шийлача, цӀайза денача Ӏай гаьнарча Сибре Ӏодигар - из чов цӀаккха а ерзаргйоацаш йисар наьха дегашка. Цу нийсхо йоацаш даьча зулама юкъе 500-600 эзар саг вар. Шоай хьамсарча лаьттара баьнна, новкъа баха бийзача гӀалгӀаша лайра моцал, лазараш.
Унзара ханаш яр уж, цига бейнараш, хоамо яхачох, 100 эзар саг нохчий, 23 эзар саг гӀалгӀай ба - из да хӀара виълагӀвар къастаь хилар, юха мехка ца воалаш.
