Келаматанаькъан Махьмуд-Ӏаьла: тӀема хьалха латтараша белгалвир вай къаман майра бӀухо
ТӀема аренашка лакха майрал, денал гойтарах белгалвир артиллерийски дивизионе тӀема декхараш токхаш вола вай мехкахо, зӀамагӀавола сержант ГӀогӀанаькъан М. Вай мехкадаьга Келаматанаькъан Махьмуд-Ӏаьлага баркал оалаш, каьхат дайтар тӀема хьакимаша.
Вай къаман бӀухо иштта денал, яхь йолаш белгалваларах доаккхал, деш из каьхат ший лелеграм-канале Ӏочуоттадир вай Мехкадас.
«Доаккхал деш, шо лоархӀаш хоам бу оаха, шун мехкахо ГӀогӀанаькъан М. А. тӀема аренашка кхерам яхача дешах ца озалуш, деналах, майралах, яхьах визза бӀухо ше волга хьагойташ хьавоагӀилга. Даьхен гӀулакха латта кийча вола, цун сий лорадергдола, ший къаман цӀи дикача оагӀорахьа дӀайовзийта визза воӀ ва из. Иштта бола бӀухой ба коталон ди гаргадоаладераш. Россе цхьоагӀо бахьан, дерригача дунен тӀа машар боаржабара тӀехьа, вай берий кхоане, вай даьй котало бахьан тӀом беш латт из тахан!» - йоах каьхата тӀа.
«ТӀема операцен юкъе дакъа лоацаш вола вай хӀара бӀухо лакхара денал, яхь гойташ латт, хьалхарча дийнахьа денз. Даьхен бизза къонгаш шоаш болга хьахьекхад цар. Вай массане доаккхал деш хӀама да из тахан», - белгалдир Келаматанаькъан Махьмуд-Ӏаьлас. Къаман яхь лораярах доккха баркал аьлар Мехкадас вай бӀухошта. Могаш, маьрша болаш, котало яхьаш, ма хулла сихагӀа цӀенах кхета даькъалабийцар цо уж.
