Къоастой Урусхан тӀема операцен юкъе дакъа лоацаш хиннав. Цун наькъах масал хинна вахар Ӏаьла Даьхен гӀулакх лораде. Цар деналах, майралах дувцаш йола передача вайна гургья, хьатӀабоагӀача бетта хьалхарча деношка.

«Украинерча тӀема операценна юкъе чӀоагӀа майрал гойташ, къаман сий доаккхаш латта бӀухой, вай доаккхал де дезарех ба. ТӀема денош доладеннача хьалхарча дийнахьа денз, белгала болаш, шоаех дика цӀи йоаккхийташ, хьабоагӀа вай сийдола къонгаш», - аьлар Мехкадас.

Республикан кулгалхочо белгалдир, иштта яхь йола, шоай декхараш дизза кхоачашдеш бола бӀухой кхувш латтача къонача тӀехьенна хоза масал долга. Новразанаькъан Ӏаьлий тӀема деношкара вахар укх шера бӀаьсти берригача мехка дӀадайзар. ТӀема декхараш кхоачашде ваха къона бӀухо, эггара хьалха де доацаш байнарашта юкъе вар, тӀаккха кхелхав аьнна хоам бенабар гаргарча нахага. Ерригача рота юкъера дийна виса бӀухо ва Ӏаьла. Лозаваь волаш, 7 дийнахьа хи къург боацаш, кхачах хӀама доацаш текхаш никъ баьб цо, ший новкъостий бола моттиг йолчахьа. ДегӀа дикка хало хиннача бӀухочун кога пӀелгаш гӀорадаьдар, тӀехьагӀа уж дӀадаха дезаш эттар гӀулакх.