Мехкадас даькъалабийцар Нохчий Республикан бахархой, Шолжа-Гӏалан 208 шу дизарца
Нохчий мехкара керттера шахьар ше хьакхелла 208 шу дизар дездеш ба. Цу денца республикан кулгалхо Кадыровгӏар Рамзан, иштта беррига бахархой даькъалабийцар Гӏалгӏайчен кулгалхочо Келаматанаькъан Махьмуд-Ӏаьлас.
«Шолжа-Гӏала атта боацача наькъах чакхъяьлар. Тахан из я дика дегӏайоагӏаш, укх тӏехьарча шерашка дукха хӏама хувцаденнад цига. Керда фусамаш, наькъаш, юкъарлон доазонаш, вахарца ювзаенна гӏишлош, вай заман архитектуран моттигаш хьалъяьй. Нохчий столицо тӏаоз Даькъастен республикай хьаьший эза ца ӏеш, ерригача Россе бахархой. Дӏахо а иштта дегӏайоагӏаш, йоккхий проекташ юкъейоахаш, толамаш даха аьттув хилба шун. Беррига бахархой могаш, паргӏата, кхоане йолаш бахалба», - аьлар Келаматанаькъан Махьмуд-Ӏаьлас.
Шолжа-Гӏала хьакхеллай 1818 шера, цу хана Шолжа хин берда тӏа хьалйир гӏала. Ах бӏаь шу кхы даьлча – 1870 шера шахьара цӏи лелае бокъо елар цунна. Советски ханашка Нохч-Гӏалгӏайчен столица яр Шолжа-Гӏала.
