Гӏалгӏай паччахьалкхе кхеллача Денца, бахархой даькъалабийцар вай Мехкадас
Вай къаман боккха лоархӏам болча, гӏалгӏай паччахьалкхе хьаоттара Денца даькъалабийцар мехкадас Келаматанаькъан Махьмуд-Ӏаьлас республикера бахархой. Дуккхача къамех латтача Россеца болаш, шоай къаман хӏама хьаоттадара, доккхача дикашка кхачара тӏехьа къахьега ловш хиннача гӏалгӏашта доккха ди да из.
«Таханара ди гӏалгӏай къаман исторе чӏоагӏа лоархӏаме да – Гӏалгӏай паччахьалкхе кхелла Ди. Къаман юкъара-политически, вахара, культуран оагӏонашца доккхий хувцамаш хилар из чӏоагӏо оттаяьчул тӏхьагӏа. Вай къаман нах массахана къахьегара тӏера болаш, лакха начӏал долаш хиннаб, цунга хьежжа хӏара денна тоалуш доагӏа республикера гӏулакхаш, наьха вахара хьал а дикка аттача даьннад.
Даьхе езаш, цун хӏама лорадеш хиннаб вай дай, иштта дӏачакхдаргда вай а. Могаш, маьрша болаш, иразе, беркатаца, доккха дикаш доаржадара тӏехьа аьттув болаш бахалба мехкахой!» - йоах тахан вай Мехкадас.
Гӏалгӏай автономи хьакхоллар хьакхайкадаьд 102 шу хьалха – 1924-ча шера кӏимарса бетта 7-ча дийнахьа. Паччахьалкхе хьакхоллара наькъ тӏа лаьттараша дукха къахьийгар; сабарах, деналах ца бохаш. Цар даьча гӏулакхий хам бовзарий дегашка яхаш я цу эздийча, къамах дог лазаш хиннача наьха цӏераш.
