МагӀалбик-Кхален гӀишлонга хьажа вахача хана, «СЕВКАВСТРОЙ» ООО керттерча директора ПхьугӀой Султана ГӀалгӀайчен Кулгалхочунга аьлар, лаьрхӀача хана ишкол йистейоаккхаргья шоаш, аьнна. Проектах лаьрхӀача тайпара, ишколан гӀишло кхозза вӀаштара яь хургья.

Хьалхарча гӀата тӀа дешара кабинеташ я, зӀамагӀча классе деша дагӀача берашта лаьрхӀа, даар дуа, тӀера гӀирс хьалъолла моттиг, лорий блок, спортивни, санитарно-вахара ченаш хургья; шоллагӀча гӀата тӀа библиотека хургья, ший дешара зал а йолаш; актови зал, книжкаш лораду моттиг, доазол арахьара метташ Ӏомаду, информатика кабинеташ хургья. КхоалагӀча гӀата тӀа физикан, биологе кабинеташ, хими урока лаборатори хургья, иштта цу тӀа я логопеда кабинет а.

Из кхозза вӀаштара яь гӀишло хьалъеш я 3,5 гектара тӀа, цу юххе футбола майда а хургья. ХӀанз укх сахьате, цига дукхагӀа бола болх баь баьннаб: дӀаоттадаьд кораш, наӀараш, ток чуйиллай, пенаш хьаьхад, иштта гонахьара доазув тоадаь дала доал. «Из ишкол цу юрта мел чӀоагӀа эшаш яр дувца дезаш а дац. Йолаш йола ши ишкол хьалйизаяр, из воча оагӀорахьа Ӏаткъаш дар берий дешара.

Царна дика хьалаш а, таханарча дено дӀадеххача тайпара йола таронаш а эш. Керда хьалъяь ишкол йоккха а, сийрда а, шийл дикагӀа кхы йоацаш а хургья, шахьар тӀарча дешара моттигашта нийсса. Из ший ханнахьа дӀачуялара могар де деза», - аьлар Келаматанаькъан Махьмуд-Ӏаьлас, гӀишлонхой кулгалхочунца ше къамаьл деш. Белгалду,

Йоккхача Ачалкхе карарча хана болх беш 17, 22 номераш йола ши ишкол хилар, царех цаӀ 1976 шера яьй, из 320 моттига лаьрхӀа я, бакъда карарча хана эзар совгӀа бер да цига дешаш.