Политехнически колледж тоаеш бола болх, 90%-га кхоачаш чакхбаьннаб
Ӏарпенаькъан Ювсапа цӏерах йола колледж тоаяра болх, таханарча дийнахьа 90%-га кхаьчаб. Мехкарча гӏишлон балхех йолча Министерствос хьаллоацаш, дӏахьош ба из болх. 128 миллион сом ахча да цу гӏулакха хьахьожадаьр. «Профессионалитет» яхача федеральни программага, «Кагирхойи, бераши» яхача Россе Президента Путин Владимира чӏоагӏонца йоаржаяьча къаман проектага гӏолла дӏахьош ба из боккха болх.
«Иштта доккха хувцамаш деш, тахан хьалхара тоаеш я колледж. Дешара аудитореш, лаборатореш, пхьоаллеш тоаеш; гӏишлон тӏера куц хувцаш, къахьегаш боахк цига. Иштта хин, йӏовхала турбаш, тока лини, цӏена фо лоаттадеш дола гӏирсаш хувцаш къахьегаргда колледже. Карарча хана чура пенаш шаьрдеш, басар хьокхаш, керда наӏараш оттаеш, кӏалхара кӏийле, радиатораш хувцаш боахк болхлой. Студенташца цхьацца гойтама балхаш дӏакхахьа дуккха аттагӏа хургда колледже, беррига болх йистебаьлча», - дийцар «Сердалога» мехкарча цу оагӏон министерстве.
Ӏарпенаькъан Ювсапа цӏи лелаеш йола колледж «Профессионалитет» яхача проектага гӏолла доагора-энергетически оагӏонцара къахьегамхой кийчбара тӏехьа лоархӏаме дакъа дӏалоацаш я. Боаггӏача боараме тоаяь латтача лабораторешка, дешара корпусашка тахан хьадаьннача гӏирсашка гӏолла, шоай говзал дикагӏа караерзае аьттув хургба студентий. Йиллача хана йистебала гӏерташ, шин сменах къахьегаш ба болхлой.
Укх бетта 20-ча дийнахьа кийча хила езаш я колледж, беррига болх чакхбаьнна. Гӏишлон балхаш деш йола тоабаш дӏайолхашше, хьехархой тоаба я араяла езаш. Аудиторешка кулг тохаш, студенташ тӏаэца кийчо еш хургба уж. Тов бетта 1-ча дийнахьа массахана санна студенташта ший наӏараш хьаелларгья колледжо.
