Юстице капитан волча Бохтаранаькъан Тимура майдилг елар
21.05.2025 16:48
«ГӀалгӀай Республикан паччахьалкхен 100 шу дизарах» йола майдилг елар юстице капитана Бохтаранаькъан Тимура мехкарча Парламента хьалха латтача ТӀумхой Мухьмада.
РФ керттерча тохкама оагӀон Тохкама комитета ГӀибухьерча куран геттара лоархӀаме дола гӀулакхаш гучадахара тӀехьа воккхагӀа вола тохкама болхло волаш къахьегаш ва тахан капитан. Доккхий зуламаш гучадахара юкъе йоккха моттиг дӀалоацаш ба цо дӀахьош бола болх, хӀаьта из теркал ца деш дисанзар.
«Дог тийша ва со, дӀахойодача хана а хьай болх иштта бехктокхаме Ӏа дӀахьоргхиларах», - белгалдир Халкъа Гуллама спикера, мехка гӀулакха латташ цо кхоачашдер мел лоархӀаме да теркалдеш.
