Гӏалгӏайчен КДЛ 200 дезала кхачан тӏормигаш делар
Хьатӏадоагӏаш деза бусалба наьха цӏай Ид аль-Фитр хиларца дувзаденна, Гӏалгӏай Республикан «Дикача наьха клуба» ганзо кхачан тӏормигаш делар 200 совгӏа дезала, яхаш, дийцар «Сердало» газетага цу моттиге.
Хӏанз ворхӏлагӏа шу да ганза ше терко лоаттаеча наха новкъостал ду, уж ба таро йоацараш, бой, магар эшаденна бераш дола дезалаш, е вахара халача хьалашка бахараш. Из сагӏа даккха таро хилар Гӏалгӏайчен бахархоша дикача гӏулакхашта чудоагӏаш шоашкара ахча гулдарах. Цу тайпара вай бахархоша 3 145 787 сом гулдир.
Ганза болхлоша, волонтёраша дика дакъа лацар бахьан долаш, цӏай истола тӏа оттабеча кхачан тӏормигаш гулде таро хилар шин дийнахьа: цар чу бар сомаш, баьцадаараш, мерза хӏамаш, хӏара денна эшаш йола кхачан продукташ, иштта дулх.
«Беза мархий бутт - къахетама ха, уллуврча сага йоакхо е еза, терко лоаттае, эшача новкъостал де деза ха я. Дукхача дезалашта из цӏай дӏадахьар хало йолаш хул, хӏана аьлча цхьайолча хана истола тӏа оттаде даар доацараш а нийслу.
Къаьстта езача хана шоаш дагабохар, хьаллацар царна лоархӏаме да. Царна ха деза шоаш цхьаь боацилга, шоашца Мархий ха екъаш нах болга. Тахан вай цхьана хиларах, из цӏай сийрдагӏа, хозагӏа де таро хилар вай», - аьлар «Дикача наьха Клуба» БФ кулгалхочо Матенаькъан Натас.
