Магӏалбика кхален КДЦ тоабо дакъа лаьцар белхий беча
Гӏалгӏайчен Магӏалбика кхален доал деча даькъ тӏарча Культуран-салоӏама центра тоабо хьаллаьцар республикан юкъара экологически болам. Боккха белхий бир, дерригача культуран Цӏеной болхлоша дакъа а лоацаш.
«Цу дийнахьа, кхален хӏара юрта болх кхехкаш бар. Юртарча культуран-салоӏама урхаллений балха коллективаш араяьлар ӏа дӏадаьнначул тӏехьагӏа лостам бе, гонахьарча даькъ тӏа. Доакъашхоша дӏаяьхар йокъаенна баьцаш, наькъа такилгаш цӏендир, кӀотаргаш еӏар, зизаш меттадоаладир.
Культуран Цӏен берригача болхлошта из къахьегам хинна ӏац, из юртахой вӏашагӏтохаш йола моттиг я. Массанена деза, укхаза духхьал салоӏама ха дӏаяхьарал совгӏа, цӏена, хоза кулг теха хилар», - аьлар «Сердало» газетага Магӏалбика кхален КДЦ.
Цхьана вӏашагӏкхийтта болх дӏабахьаро таро елар бахархошта шоайла безаме къамаьл де, иштта доазон тӏа хоза лостам бе.
КДЦ бахархой тӏахьех, культуран болхлошца цхьана из дика гӏулакх хьаллацара, шоай хьамсара мохк цӏена лелабара.
