Байракхаш лораеш хиннай Терски областа кулгалхочун Атамански зале, бакъда 1917-ча шера, революци яьнначул тӀехьагӀа, царех бола хоам байна хннаб. Мехка гӀолла йолча Федеральни Ганза урхаллено, Россе Ганзо хьал а лоацаш, шийна могар дир цу байракха лараш дахара, уж юххера а ГӀалгӀайченга хьакхаьчар.

Из кхетаче дӀахьош, Россе Президента СКФО гӀолла волча викала гӀончас Надыкто Владимира моаршал луш дола каьхат Ӏодийшар, викала Чайка Юре цӀерагӀа. Цо белгалдир из гӀулакхаца дувзаденна вошал, граждански бехктокхам лакха хилар долга, лерхӀам болга.

ГӀалгӀайчен Кулгалхочо Келаматанаькъан Махьмуд-Ӏаьлас ший аргӀагӀа белгалдир, цу байракхашка гӀолла Россе лакхарча тӀема кулгалхоша гӀалгӀашта, цар тӀема начӀала терко лоаттаяр хьагойтилга.

Цул совгӀа, белгалдаккха деза, хьалхагӀа Федеральни ганза урхаллене из хьагойташ дола каьхаташ хьаденнилга.

«Паччахьа ханашка денз, гӀалгӀай инаралаш, эпсараш, салтий белгалбоалаш хиннаб тӀема говзалца, начӀалца, деналца.Тешаме а денал долаш а шоаш хилар гӀалгӀаша гойтар Сийлахь-боккха Даьймехка тӀом латтача хана, Афганистане Россе доазув лорадеш. Тахан эзараш бӀухой дакъа лоацаш ба СВО, цар лораду вай Даьхен доазонаш. Вай масал эца йиш йолаш дукха ба! Баркал ала лов исторически материалаш вӀашагӀйохкаш къахьегаш мел хиннарашта, из йоккха Ӏилман ганз я», - аьлар мехка Кулгалхочо.

Байракхий лараш хьалуш хиннача кхетачене дакъа лоацаш хиннача Федеральни ганза кулгалхочо Михайлик Александра а къамаьл дир, цо баркал аьлар Келаматанаькъан Махьмуд-Ӏаьланна, цо гӀалгӀай Ӏадаташ, исторически дагалоаттам лорабарах.

ТӀатоха лов, байракхий лараш даха таро хургьяцар, публициста, архивиста Алмазанаькъан Ӏийсас хьаенна, Надыкто Владимира гулъяь материалаш хиннаецаре.