Культболхлоша дакъа лаьцар, Шолжа кхалера жӏакаех йола яхьаш кийчъеча
Гӏалгӏайчен Шолжа кхале дӏайихьар жӏакех ловзара яхьаш; уж вӏашагӏъехкаяр, «Россе Низ» яхача Ерригроссийски спортивни болама чуйоагӏаш. Кхетаче дӏахьош дакъа лоацаш хилар Алхастера культуран цӏа, цо шийна могар дир уж яхьаш цӏай мо дӏаяхьара.
«Турнир лоархӏаме хилар гуш дар сий дола хьаьший цига баьхка хиларах: «Цаӏ йола Росси» яхача парте, кхален администраце, бокъонаш лораерий викалаш. Шоаш къамаьл деш, цар белгалдир спорт, культура дегӏайоалаяр вай республике керттерча декхарех цаӏ хилар. Жӏакаш – из духхьал ловзар хинна ӏац, из оамал чӏоагӏъялар да. Цу дийнахьа шоайла яхьебаьнна, чуийнна, уйла тӏайохийташ бар ловзаш хиннараш», - аьлар «Сердало» газетага культуран-салоӏама моттига кулгалхочо Боканаькъан Заретхана.
Къаьстта цӏай хилара белгало яр республикан цӏихеза артисташ цига баьхка хилар. Гӏалгӏайчен халкъа артиста Пхьугой Амира гулбеннарашта ший иллеш даьхар, хӏаьте «Лоаман кхалсаг» яхача халхарий ансамбло, Боканаькъан Залинас кулгал а деш, шоай хьинаре «Цхьоагӏон болар» яха халхар гойтар.
Цу кхетаченах гуш дар культура, спорт вӏаший юхе хилар; тайп-тайпарча ноахалех бола нах вӏашагӏтохаш, вай юкъара мах бараш цар чӏоагӏдеш хилар.
