Спортсмена Логинов Станислава сий дир МагӀалбик лораеш лаьттарий
Велосипедаца хьоашал дола Новосибирскера Логинов Станислав лаьрххӀа тӀаийцар тӀема сийлен шахьаре МагӀалбике. Укх деношка 2400 километр вера из «ГӀала-турпал Севастополь – турпал-шахьар Ленинград/ Санкт-Петербург» яхача новкъа гӀолла. Вай мехка тайп-тайпарча шахьарашка юха а сецаш, цо дувц кхувш йоагӀача тӀехьенна, тӀема шерашка хиннача турпалхой наькъах лаьца. ЦӀихезача спортсмена никъ ба, Сийлахь-боккха Даьймехка тӀом лаьттача моттигашка гӀолла чакхбоалаш.
«Укх наькъа марафона доакъашхой МагӀалбик- Шахьаре нийсбелар, цига цар кхетаче хилар спортсменашца, дешархошца, юкъарча цхьанкхетарий кулгалхошца. Логинова дийцар, Севастополера Санкт-Петербурге кхачале 30 шахьаре шоаш чакхбала безаш хиларах, цу юкъе турпала цӀи лелаеш бархӀ шахьар а йолаш», - аьлар «Сердало» газетага МагӀалбик-Шахьара администраце.
ТӀема сийле гӀала йолча МагӀалбика бахархоша сий ду Кавказа тӀагӀерта хинна моастагӀа юхатохаш, МагӀалбик лораеш латаш бейнача салтий. Тирка дукъ тӀа майрал гойташ, дукха цӀий Ӏомохкаду, цига велар 120 эзар советски салтийи эпсараши.
