«Илдарха-ГIалан прокуратуро моттигера вахархо бехке веш дола уголовни гIулакх хьадийллад, цо корта бохабу малар менна машен лаллар теркал а деш. Из доацаш а, хьалхагIа цу тайпара зулам даь хиларах, суд текха а хиннав из», — йоах хоамо.

Тохкамхоша яхачох, из саг карарча шера Илдарха-ГIалий тIа, хьалхагIа цу бахьанах лаьца ваьллавале а, машен лалла луш йола бокъонаш дIаяьха вале а, юха а малар менна воагIаш, соцаваьв даькъ тIарча полице.

Ала деза, цу тайпара харцахьара нах чIоагIа унзара ба, шоашка гIолла машенаца хьабоагIача наха а иштта гIашлошта а зулам де тарлу цар. Хийла моттиг нийслу, иштта машен тIатехе саг вувш а. ХьалхагIа газето хоам баьбар, цу тайпара моттиг вайцигарча юрташка нийсъенна хиларах.

Дувцаш дола гIулакх ГIалгIай Республикан Илдарха-ГIалан районни суде дIадахьийтад.