LADA Vesta яхача машена чархаш йохкаш хинна хIиллане дохкархо, лохаш ва Iаьдало
LADA Vesta яхача машена чархаш йохкаш ва со, аьнна, вай мехкахочунна хьамаргаш йийца, 28 эзар сом ахча даьккхад зуламхочо. МВД болхлой тахан, из лохаш, болх дIахьош ба. «Сердало» газетага из хоам бир МВД викалаша.
«МВД болхлой болча латкъа венача сага дийцар, интернета оагIон тIа «Лада Веста» яхача машена ахкан хана лелаю чархаш йохкаш ва ше, аьнна, хоам оттабаь, ше Iехаваь, 28 эзар сом ахча даьккхад шийгара, аьнна. Ахча каракхаьчачул тIехьагIа, зуламхо вайна дIаваьннав, чархаш хьаяйтаяц. Карарча хана, из гIулакх тохкаш латт», - белгалдир МВД. Массахана санна, атта тешаш бола нах ба зуламхоша Iехабераш.
Дуккхаза а кхайкарал даьд, боккъал ма теша шоашта ца бовзача нахах, ма кхахьийта царна ахча дIатIа! «Маьха дикка чухьнахьа йохкаш, хIамаш я яхача интернетерча хоамех ма теша! Зуламхоша тайп-тайпара наькъаш лех, атта тешаш бола нах Iехабе.
Бовзаш боацача нахагара интернете гIолла хIамаш ма ийе, царца бувзаме ма дувла! Боккъал а фийла хила, ма Iехадайта шоаш, дер дайна, нах Iехабеш лелача зуламхошка!» - йоах Iаьдала болхлоша деча къамаьла юкъе.
