Мехкадас эскаре тIахьехачар комиссеца кхетаче йир
Глава Ингушетии Махмуд-Али Калиматов провел заседание Республиканской призывной комиссии с участием членов кабмина, представителей силовых структур, глав муниципалитетов, представителей военного комиссариата, информировали газету «Сердало» в пресс-службе руководителя региона.
«ВIашагIкхетаре дийцар, бIаьстий эскаре амал де кагий нах тIахьехаш бола болх 2023 шера ГIалгIай Республикан доазон тIа лерттIа дIабахьа кийчо е езарах, цул совгIа, уж шоай ханнахьа хьатIабоагIаргболаш а лорашка чакхбаргболаш а кийчон болх хьалххе вIаштIехьа баккха безарах», — йоах хоамо.
ГIалгIай Республикан тIема комиссара Гадаборшанаькъан Зоврбика яхачох, хIанз укх сахьате аргIанара болх цу даькъ тIа дIахьош ба, Iаьдало оттаяь ха я 2023 шера бекарга бетта цхьоалагIча денгара денз кIимарса бетта пхийттлагIча денга кхаччалца.
ГIалгIайче гIолла верригаш а эскаре тIахьехаш ва 250 саг. Царга хьежаш да РФ къаман гварде, фегара-космически, тIема-фегара, гIашлой, иштта форда флота тIема доакъош.
Вай республикера эскаре дIабугаргба бекарга бетта пхийттлагIа ди дIадаьнначул тIехьагIа, из болх йистебаккха беза, маьтсела бутт (май) йистебалалехь.
Контрактах тIема гIулакх де болхача нахаца терко тIайохийташ болх бе беза, цу хьакъехьа хьалхашка латта декхар дизза кхоачашде деза», — аьлар тIема комиссара.
Цо иштта хоам бир, ГIалгIай Республикан тIема комиссариатаца, шахьарий, районий администрацей кулгалхошца наха юкъе из болх дIабахьара кийчо яьй, аьнна. Цу юкъейоагIаш я юкъара балха моттигаш, Iилма дийша нах, наха юкъе лоархIаш бола нах.
Массайолча администрацешка эскаре тIабехаш бола нах йоазонца дIабахьийтаб.
Республикан унахцIенон Министерствос хьабайтача хоамах, Наьсарен, Шолжа, МагIалбика, ЖIайрахьа районашка эскаре тIахьехаш бола нах чакхбоахача лорий комиссей болх вIашагIбеллаб. Республикан унахцIенон министерствон амар арадаьннад, бIаьсти эскаре амал де болхача кагирхой лорий комисси болх бе кийчъярах.
Из дош дувцаш, Келаматанаькъан Махьмуд-Iаьлас гулбеннарий теркам тIабахийтар, республикан бахархошта эскаре амал дара кегийнах тIахьехаш бола болх ма барра бовзийташ хила беза, аьнна. Иштта мара таро хургьяц тIахьехама кампани лерттIа дIаяхьа.
«ХIара тIахьехаш волча сага ховш хила деза, эскаре вахар хIара маIача сага граждански декхар долга, Россе Конституце тIа яздаь а да из. Бакъда кагирхошта дукха ховш дац, цхьа шу эскаре даккхар царна шоашта пайда бахьаш долга.
Къаьстта цига чIоагIлу цар денал, оамал, бехктокхаме хилар, професси Iомаяр, унахцIена хилар», — аьлар ГIалгIай Республикан кулгалхочо.
Цо иштта белгалдир, къонача наха, иштта цар даьшта-ноаношта хьалхадаккха деза тIема операце дакъа лаца уж бугаргбоацилга.
