ХьатIадоагIача оршот дийнахьа, Россех ГIалгIайче дIакхийтта 254 шу дузаш хилара хетаяь кхетаче дIахьоргья МагIалбике. Ерригроссе, «Толамий марафон» яха болам дIабахьа хержай Алиев Гейдара цIерагIа аллея, яхаш, дийцар «Сердало» газетага МагIалбик-Шахьара администраце.

«Толамий марафоне» дакъа лоацаш, доал деча даькъ тIара болхлой а хургба, «Шахьара дика хьалаш» яхача проекте шоашта карагIдаьннар гойташ, цига го йиш хургья тоаяьча моттигашка нах мишта бах, уж тахан мишта хоза я. Марафон дIахьош халкъа салоIамаш, тайп-тайпара спортивни яхьаш хургья, иштта цIайна хетаяь кхыйола моттигаш дIахьоргья.

«Шахьара дика хьалаш» яхача проекта чудоагIа, вай мехка дукхагIа нах лелача моттигашка салаIа безам хургболаш, атта хьалаш хургдолаш, шоашта пайдане долчча оагIорахьа наха шоай салоIама денош дIахьоргдолаш дола хьалаш вIашагIдохкар. Паркаш, сквераш, кхыйола салоIа моттигаш тоаяр, из тахан моллагIа ха яьннача наха ца хилча даргдоацар да, из чIоагIа эшаш да.

«Толамий марафон» - из лоархIаме дакъа да, «Шахьара дика хьалаш» яхача проекта чудоагIаш. Цо юкъара моттигаш тоаяра мах оттабарал совгIа, цу хьалех салоIача хана мишта пайда эца беза хьагойт, тайп-тайпара спортаца дувзаденна гIулакхаш дIадахьар мишта хила деза а гуш хургда цига.