– Адам, мишта кхаьчар хьо цу профессега? Хӏана хержар Ӏа къаьстта актёра-каскадера болх?

 – Са актёра-каскадёра никъ дӀаболабенна дикка ха я. Из аз харжара бахьан да, даим  физически, профессиональни дегӏава ловш со хилар.

Каскадёра болх беш вола саг дика  физически кеп йолаш хила веза, тӀема искусствай  тайп-тайпара говзалаш йолаш а. Хӏара керда проект - из керда тӀахьехам ба, иштта кердадарашта тӏакхера  йола таронаш а я.

  – Цу атта боацача балха хьона низ лур фуд?

  – Шоай гӀулакх дика довзаш болча говзанчашца болх баро сона низ лу. Хоалуш хул хье хьаллоацаш хилар. Тхо балха новкъостий хинна Ӏац – цхьа дезал ба, моллагӀча хана накъабоагӏаргбола, халача хана хьаллоацаргвола.

 – ЛоархӀаме дий-хьогӀ каскадёра хар, ший турпал малав е хьалхарча даькъе оттадаь кхыдола декхараш хул?   

 – Каскадёра лоархӀаме да цкъа хьалхагӀа технически хьал малагӀа да хар, иштта  турпалхочун оамал йовзар. Масала, говзал йолча  бӀухочо тохар ший тайпара хул, Ӏомалуш волчо тохачул белгалйоалаш, деш дар цаӀ дале а. Оамалах тийша да  дӀа-юха хьар, кадай хилар,  деш долчун дикал. Каскадёр уж моттигаш гойта езаш ва, ше хьадечунга гӀолла.

 – Мишта таро хилар хьа наггахьа мара боацача из чоалхане професси лелаеча наха юкъеваха?

 - Из иштта атта а дацар, бакъда безам тӀабодаш дар. Хьалхарча аргӀагIа хила езар физически кийчо я, со цига гӀолла чакхваьлар, зӀамига волча хана денз. Ишколе ухача хана вар со спортацара хьоашал дезаш, цигара хьадоагӀа аз из професси харжар. Дика физически кеп йолча наьха мара вӏаштӏехьа дац цу даькъ тӀа толам баккха. «Легион про» яхача каскадёрий ишколе аз Ӏомадир, унзара доацаш, ӏовожара хьалаш мишта хила деза, говра тӀа вагӏара урокаш. Цунца цхьана Ӏомавелар шийла герз леладе. Из гӀулакх сайна чӀоагӀа дезаш хиларо толамаш даха а низ белар.

 - МалагӀа унзара моттигаш нийслу хьона хьалхашка  таханарча заман фильм доаккхаш?

 – Таханарча заман  каскадёраш кхоачашдеш ба дукха унзара хӀамаш, цига дӀадехаш да лакха професси хилар, дика кийчо яь хилар. Из да сцена тӀара хьал, тӀема искусство, вӀаший качдаха латар, шийлача герзаца болх бар, дукхача латара юкъе нийсвалар, йоагача цӀерца дувзаденнар, говра тӀа вагӀар, говраш тӀара чукхувсалуш хилар, хехка йодача говра тӀа вагӀаш, цхьацца говзалаш гойтар. Царех хӀарадар Ӏомадеш, дукха сахьаташ даха дезаш хул, уж чӀоагӀа нийса вӀашагӀдохка деза. Каскадёрий кӀезигагӀа яле  8-10 лаьрххӀа йола уж говзалаш хила еза, даим  дегӀа а йоалаеш.

 – Мел эшаш я хьа профессе физически, психологически кийчо?

 – Физически, психологически кийчо профессе ца хилча яргйоацарех я.

 – Кагирхошка фу аргдар Iа?

 -Даим дегӀадоагӀаш хила. Дуне сиха хувцалу, кердадараш Ӏомадер мара вусаргвац яхьашта юкъе. Ховш хила: толам баккха хала дац шоана, нагахьа санна даим шо, ца кхераш, къахьегаш хуле, моллагӀа дола бехктокхаме гӀулакх дӀадахьа кийча хуле.

- Мел эшаш да шун балха юкъе доттагӀал, шоайла хьаллацар?

 - Уж ца хилча даргдоацаш да. Цу лоархӀамеча балха уж доацаш йиш яц; - тешамеча новкъостах тийша ба, съемкай меттел, сага вахара толам а.

– Адам, баркал хьона тхоца къамаьл дарах. Кердача проекташка аьттув хилба хьа.

 Хоам:

 Зубейра Адам ваьв маьтсела бетта 19-ча дийнахьа 1993 шера, МагӀалбик шахьаре.

1999 шергара 2010 шерга кхаччалца  из деша ваьгӀар МагӀалбикерча №20 йолча ишколе.

Цул тӀехьагӀа деша эттар Агроинженерни факультете, ГӏалгӀайчен паччахьалкхен университете, из цо тӀехдика чакхъяьккхар.

Дезалера хьал - саг йоалаянза.