Ма хоза, АллахIа хьалхашка деза, маьл хургболаш гIулакх да царна дагадехар! Са шозза аьттув баьлар цига нийсъяла. Укх бетта ялхлагIча дийнахьа со яхар, культуран оагIон болхло йолаш. Пхи сахьат даьлча гуллу нах. Марха даста ха хьаотталехь, викторинаш, пайдане дола ловзараш хул цига. Ерача дийнахьа цига гулбеннабар филармонера, вай мехкарча массехк театрера, Магасера культура, спорта, туризма болхлой. Иштта дIакхухьача кхетаченаша тахан вайна юкъе доккха дикаш доаржаду. Нах шоайла бовз, барт, безам чIоагIлу. Викторино оттадаь керттера декхар — эрсий дешаш гIалгIай меттала дахар.

Кхетаче дIахьош волча ЦIечой Амира хаттараш дешача юкъа, шоай лоIаме гIо деш лелараша тоабай жопаш дIаяздора. Тхона таржам де ца хайна дешаш Iодийшар. Уж дар бинокль, остров, топливо. Ши тоаба маIача нахах латташ яр, цаI — кхалнахах.

Котало кхаьчар кхалнаьха тоабанга. Белгалде деза, цу берригача нахага марха доастийташ дола гIулакх, Даьла духьа лелаш волча цхьан дикача сага шийна дIатIаийцалга. Ший цIи яккха пурам деннадац цо, деш дола дика шийнеи АллахIаи юкъе хургдолаш.

«Тешамерча» наха эшаш мел дар Iалашдаьд гулбеннарашта. Ламаз эца, хьаде моттигаш я цига. Укх бетта 8-ча дийнахьа цига гулбелар суртанчаш, йоазанхой, «Сердало» газета болхлой. ГIалгIай викторина дIайихьар цига ялх тоабан юкъе. Геттара дезаденна дIадихьар из гIулакх кхетаче баьхкараша. Цул совгIа, вай дин довзийташ йола яхьаш хилар. Хий менна марха даьста, ламаз даь, тIаккха шу дуаш марха даьстар гулбеннараша.

ЧIоагIа хоза, дог гIоздоалаш дIайихьар из сайре наха. ВIаший йистхулаш, белаш, пайда эцаш яьккхар цар из ха. Массане цхьана дIаайтта сурт даьккха, баркал аьлар из беркате гIулакх дагадийхарашта. Иштта дола вIашагIкхетар дег чура ханахьа дIадалац. Цо чIоагIбу юкъера бувзам. Доккха баркал ала лов цIаькха а, из дика болх дIахьош болча «Тешам» яхача моттигерча наха. Ираз долаш хилда цар наькъаш!