«Дукхача шерашка, «Россе почта» яхача Акционерни юкъарлон болх хьагойташ дика къахьегарах» совгӀаташ делар цо, цу пресс-конференце дакъа лоацаш хиннарашта. Цунца къамьл хиннача тха корреспондента массехк хаттар дир цунга.

- Карарча шера белггала малагӀа толамаш даьхад оаш?

- Хьалхарча аргӀагӀа ала ловргдар сона, Россе почта 30 шу дузаш хиларца дувзаденна оахаш дӀайихьача йоккхача кхетаченах. Цу лоархӀамеча кхетачене, тхоай дикагӀа болча болхлошта паччахьалкхен совгӀаташ делар оаха Россе почта кулгалхой цӀерагӀа.

Иштта лоархӀамечарех цаӀ да, мехка а СКФО а гӀолла балхаца ювзаенна яхьаш дӀаяхьар. Цига дакъа лоацаш хилар тайп-тайпарча моттигашкара почта болхлой. Вай мехкахоша цига гойтар шоай балха говзал лакха хилар, шоаш къахьегама тӀера хилар, цар яьхар хьалхара моттигаш.

Укх тӀехьарча ийс бетта, ГӏалгӀайчера дӀадахьийтад 2 249 002 мехка чухьара а, иштта халкъашта юкъера а почтаца дувзаденна хӀамаш – уж да 170 534 хьачудоагӀаш а, иштта 14 878 сиха дӀайохьийта посылкаш а цу юкъе йолаш дола балха дакъа. Цу даькъ тӀа дика къахьийгалга гуш да, хӀана аьлча дӀадахача шера ийс бетта баьча балхал 10% дукхагӀа ба из.

Иштта, дукха посылкаш дӀаяхьийтарал совгӀа, цу юкъа тха тоабах чакхдаьлар 2 063 590 хӀама, массазара а иштта заказах а йола корреспонденци (каьхаташ, бандеролаш, уведомленеш, почта карточкаш). Укхаза юха а гуш да, дӀадахача шера хинначул 40% из болх дукхагӀа баь хилар.

- Почто малагӀа гӀулакхаш лоаттаду наха?

- Россе почто нахага дӀакхоачийт корреспонденци, посылкаш, пенсеш. Тха болхлоша нахагара хьаэц коммунальни хьалех бола мах, йоала тела ахча, ГИБДД гӀод теха хиларах, Ӏаьдала хьачулуш дола ахчаш. Уж да лицензи йола товараш, уж лоаттаду централизованни товараш лоаттадеча наха. Из товар ханахьа ца талхаш а, дикал йолаш а хул. Тика тӀа долча маьхал башхало йолаш а да, цхьадараш маьха чухьнахьа да, цхьадараш маьха дезагӀа да.

- МалагӀа кердадараш юкъедаха лаьрхӀад шун балха?

- Хӏанз таронаш я тайп-тайпарча даькъ тӀа из болх дӀабахьа. Масала, (Озон, Авито, иштта кхыдола) балха наькъаш кердадаха. Бахархоша WӀldberrӀes гӀолла деш дола заказаш дукха хиларах, оаха лаьрхӀад заказаш почта бувзама 40 моттигашка гӀолла хьаэцаш хилийта.

- Цхьаболча наха яхачох, кердача технологеша почта болх дикагӀа наха накъабоалаш баьб. Ӏа фу аргдар цох?

- Почта болх дика тоабеш боагӀа таьрахьий технологеш юкъейоалаш хиларах, клиент ший электронни кулг яздича ваьннав (ПЭП), цу дешо массехк минот мара йоа яц. Тахана уж таронаш йолаш ба республикан 94 000 бахархой. Цу тайпара, 70% нах каьхаташ а доацаш, шоай посылка дӀаяхьа йиш йолаш ба.

Цул совгӀа тха мобильни приложенеш я. Уж я: телефона номерах дӀаяхьийтар, QR-кодах дӀаяхьийтар, хьаяйтар, цу тӀера накопительни бонусни программах клиента юхалу 10% дӀайохьийташ деннача ахчан тӀара. Уж бонусаш накъайоал кхыйола посылка дӀайохьийташ. Карарча шера ГӀалгӀайче 47% бахархоша юкъеяьхар мобильни таронаш, хӀаьта хӀара бетта уж лелаераш 96 000 эзар саг ва.

- Моттигерча бахархоша каст-каста хоатташ хулий ахча гаьна дӀадахьийтара йола таронаш. МалагӀча мехка дӀадахьийта йиш я из?

- Сиха ахча дӀадахьийта йиш я Турце, Франце, Китае, иштта лоалахарча паччахьалкхенашка.

- МалагӀа гӀулакхаш да шун могашал яйнача наха лаьрхӀа?

ГӏалгӀайчен филиал президентски программанна чуйоагӀаш хиларах, 2022 шера денз, наьха таро я лорий хьалех пайда эца. Масала, давлени, дегӀацара йӀовхал, сатураци йиста. Вай республике цу тайпара хьалаш башха леладеш-м дац, бакъда тхо долча хьабоагӀача наха клиенташта из эшача хана долаш да.

- Карача шера керда моттигаш хьайийллайий вайцига?

- Укх тӀехьарча шин шера почта отделенешка капитальни ремонт дӀайихьай Даби-Юртарча, Кердача -Редантерча, Ӏаьлий-Юртарча, Аьккхий-Юртарча, Жӏайрахьарча, Яндарерча почтан доакъошка. Керда гӀишлош хьалйир Илдарха-Гӏалий тӀа, Шолже, Наьсаре, Яндаре.

Дӏадахача кӀира се Москве командировке ваха волаш, аз керттерча кулгалхочунга Волков Михаилага аьлар, ГӏалгӀайче йоккха сортировочни центр йича дика харгьяр, аьнна. Цу гӀулакха лаьрхӀа йоккха майда цахиларо, болх лерттӀа дӀабахийтац. Хӏара шера корреспонденцеш совйоалаш йоагӀа.

- Фуд шун балха лоархӀамегӀдар?

- Наха лаьрхӀа долча гӀулакхашта дукхагӀа терко е еза. ЛоархӀаме да балха тоаба вӀашагӀйоллар. Аз дикача хьалашка, дикача балха тоабаца къахьега 17 шу да. Со майрра ала йиш йолаш ва, соца болх беш яр тешшаме тоаба я.

ГӏалгӀай Республикан почта бувзама Федеральни Урхаллен кулгалхочунцара пресс-конференци йистеяьлар дикача гӀулакхашца. Гаьгенаькъан Ислама даькъал бийцар шин телекомпане, кепа йоазон болхлой совгӀаташ а луш, «Дукхача шерашка, «Россе Почта» яхача Акционерни юкъарлон болх хьагойташ дика къахьегарах» совгӀаташ делар цо, цу пресс-конференце дакъалоацаш хиннарашта.