«ГӀалгӀайче массаза а хиннай хьаьша-да тӀаэцара кийча йолаш, истори, культура, Ӏадаташ ший тайпара долаш. Оаха «Росси» яхача кхетаче гойтаргда, укх тӀеххьарча шерашка ГӀалгӀайченна карагӀдаьнна дика гӀулакхаш. Уж дукха да юртбоахаме, экономике, культуран даькъе, вайцига арахецача хӀамашца, гӀишлошъярца дувзаденна. Цо таро хулийтаргья ГӀалгӀайчен Ӏалама хозне, балха говзал кхычарна дӀагойта. Тхо гӀерт вай республика, мах баь варгвоаца исторе ганз хинна ца Ӏеш, таханарча дено дӀадеххача беса дегӀайоагӀаш йола моттиг йолга дӀахайта.

ГӀалгӀайче массаза а хиннай, ший паччахьалкхе лораяра кийча йолаш. Тахан а, эггара чоалханеча хана, вай денал дола бӀухой, цхьан хана шоай даьша лелабаь Даьхе лораяра майра никъ хьа лаьца, вай боккха мохк лорабара хьалхарча мугӀарашка латт. Вай доаккхал де йиш йолаш да!», - аьлар ГӀалгӀай Республикан кулгалхочо Келаматанаькъан Махьмуд-Ӏаьлас.

Россе Президента тӀадиллача декхарга хьежжа дӀахьош йола «Росси» яха кхетаче бекарга бетта 12-ча денга кхаччалца хургйолаш я. Россен чуйоагӀача моттигаша укхаза гойтаргда шоашта карагӀдоалар, юртбоахама даькъ тӀа фу де вӀаштӀехьадаьннад; кердача технологейх, энергетиках, гӀишлошъярах, транспорта даькъ тӀа беча балхах дувца таро хургья цар.

«Росси» яхача гойтаме керттера дакъа дӀалоацаш хургда инвестицеш юкъеяхар, хьайоаккхача бийдалах пайда эцар, экономикан даькъ тӀа толамаш дахар, бахархошта хьабе болх лахар мо дола дешаш.

Мехкаша Ӏилман даькъ тӀа гойтаргда керда хувцамаш, цар вахар дикагӀа хилийтара юкъе малагӀа дакъа дӀалоац, экономика мишта дегӀайоагӀа.

Культуран оагӀув гойтаргья сийрдача проекташца, цига белгалдергда моттигашкара культура, Ӏадаташ мишта леладу.

Агропромышленни комплексо гойтаргда, юртбоахаме кердача технологеша малагӀа пайда лу. Промышленноста гойтаргба, керда, лакха технологеш йола болх, цо моттигера экономика дегӀайоалаяра луш йола таронаш, иштта из бахьан долаш хьакхоллаш йола наха лаьрхӀа балха моттигаш.

ГӀишлошъяра оагӀоно хьагойтаргья йоккха гӀишлош хьалъяра йола проекташ; вахрца, промышленностаца ювзаенна гӀишлош хьалъяра даькъ тӀа карагӀдаьннар.

Транспорта оагӀоно гойтаргда наькъаш Ӏодехкара, юкъара транспорт дегӀайоалаяра болх мишта баьб.

ГӀалгӀайче хьежаш я оагӀой бетта 8-гӀа ди хьатӀадарга. Цу хана ВДНХ бӀарчча ди вай республиканна хетадаь хургда. Укх деношка ГӀалгӀайчен паччахьалкхен председатела Сластенин Владимира белгалдаьча беса, вай гойтамга хьажа венар, мохк бовзарал совгӀа, кхы дӀахо а цун кӀоаргаленаш йовза безам болаш хургва, цул совгӀа шоай бӀаргашца царна гургда республикан мах бараш, цун хозаленаш, культуран тӀехьале. «Росси» яхача халкъашта юкъерча кхетаче, укх тӀехьарча ялх шера карагӀдаьннар гойтаргда.

Гойтам дӀахьоча хана республика йовзийташ хургда лоаман сурташ, лоаман кхаленашкара наьха вахара хьалаш, къаман проекта чуйоагӀаш хьалъяьча гӀишлонех дувцаргда. Иштта онлайн оалача кепара экскурси дӀаяхьа лерхӀ, цул тӀехьагӀа телевикторина хургья. Цига котваьнначунна, ГӀалгӀайчен ЖӀайрахьа кхален «Ӏармхи» яхача лакхача лоаман курорте салаӀа таро хургья кхаь бийсан, цу гӀулакха лаьрххӀа сертификат лургда цу сага.

Къаман белгалонашта а цхьаккха юстара вутаргвац, ГӀалгӀайчен гойтамга хьажа венар. Укхаза лургба тамашийна говзанч-хьехам, цо гойтаргда истинг-кӀувсаш мишта ду, иштта къаман даараш дергда, кулгаговзал гойтаргья. Лекцеш дӀахьош, хьаьший таро хургья гӀалгӀай Ӏадаташ довза. Къаман ашараш локхаргья, хӀаьта лоаман мехкарашеи кагийча нахеи къаман тӀабувхача гӀирса, халхара хозал гойтаргья.

Гойтам дӀабахьара чубоагӀаш, ГӀалгӀайчено кхыча моттигашкарча викалашца болх дӀахьоргба, дӀахо а тайп-тайпарча даькъошка шоайла бувзам лелабарга уж кийчбеш.

«Росси» яха халкъашта юкъера кхетаче-хьажар дӀадахьаро таро лу, берригача мехкара хьал цхьан майдан тӀа бӀаргаго. Вай Даьхе доккха истори, йоккха кӀийле йолаш я, Россе хӀара вахархо цох доккхал де йиш йолаш а ва.