Камоаршали къахетами
ГIурбан цIай дездергда республике
27.06.2023 12:34
Бусалба наха деза, беркате дола гӀурбан ди дездеш ба бахархой тахан. Из да ИбрахӀим- Пайхамара турпала гӀулакх вайна дагадохийташ дола, ХьажцӀа бахарий хьажол йистедоалаш дола доккха ди. Цу денца сакъердалуш хила Ӏемад вай дерригаш, бера хана денз. Дуккхача бусалба наьха дегашка йӀовхал лоаттаеш, адамашта юкъе къахетам боаржабеш дола из ди вайна чӀоагӀа боча да. Вай мехкадас Келаматанаькъан Махьмуд-Ӏаьлас соцам баьб, укх бетта 28, 29, 30 денош республике салоӀаш да, аьнна. «Укх дезача деношка, Даьла раьза хургвола дикаш доаржадеш, вӀаший хинна эгӀазло дӀайоаккхаш, могаш боацарашта, дог ийшарашта, бошта терко еш, цар дегаш хьоасташ хила деза вай. Дала диканца бекхам баь юхадайталда шоана, оашош даь беркате гӀулакхаш.
Даьла раьза волаш хилда вай наькъаш», — ишттача дешашца бахархошка кхайкарал ду вай Мехкадас. Сийдолча КъорӀо хьех вайна, вӀаший хьожаш; даьца, наьнаца, гаргарчарца хоза гӀулакхаш леладеш; сабаре, безаме долаш даха. Бусалба нах шоайла оагӀув хьаллоацаш хила беза.
Вайх хӀаране лархӀа дезаш, сий де дезаш, хӀамаш да уж! Дуккхача вай къаман нáха хоза терко ю укх деной, сагӀаш телаш, берий дегаш гӀоздоахаш, совгӀаташ декъаш. Вай Мехкадас вӀашагӀъеллача къаман ганзо дика новкъостал дир укх шера а Наьсарен, МагӀалбика, Шолжа, Пригородни, ЖӀайрахьа кхалешка бахача наха гӀурба де. Ганзо дулх декъаргда таро йоацача, дукха дезал болча наха. 5000 совгӀа болча мискача наха дулх дийкъад. «Оаха кхетаду, тахан дукхача наьха гӀурба де таро йоацилга. Вай бувцараш ба миска, цӀагӀа дукха дезал бола, да дӀаваьнна нах. Иштта гӀо дергда, тӀема операцен юкъе вахар хаьдача бӀухой дезалашта. Ерригача юрташка, хӀара шера жа дӀадекъ оаха.
Юртарча администраце бовз уж доагӀараш. Хоза, беркате гӀулакх вӀалла а дита йиш яц! Укх хозача деной боаггӀаш бола хам бе беза вай», — аьлар Келаматанаькъан Махьмуд-Ӏаьлас. Ший тайпара безаме, хоза денош да ераш! Дог гӀоздаьнна ба нах! ХӀара юрта, цӀагӀа кийчо еш ба цу денга. Наьха дегаш доасталуш, эгӀазло дӀайоалаш дола денош да ераш! Аьттуви, низи хилба вай; АллахӀ раьза хургволча тайпара дӀачакхдовла! Вай мохк маьрша болаш, берригаш иразе болаш, юхадоагӀалда ер хоза, даькъала денош!
