Эзараш совгӀа йолча наьха фусамашка сагӀа дӀачухьу цу деношка. Моттигерча вахара политикацара лоархӀаме оагӀув хинна, чӀоагӀденнад из беркате гӀулакх тахан. Халача хьале болча наьха оагӀув хьаллоацаш, царна терко еш дола денош хьадир бусалба наьха цӀайх вай Мехкадас. Таханарча дийнахьа дукхача наха: хьакимаша, бизнесменаша, гӀо деш йолча ганзаша, Даьла духьа гӀо де арабаьннараша - хьаллоацаш, дӀахьош да из гӀулакх.

ГӀурбан деношка 5000 совгӀа болча дезалашта гӀо дир.

Царга кийчо яр укх шера хьалххе дӀадоладаьдар. Республикан кулгалхочо тӀадилла, 5000 совгӀа жа гӀо эшаш барашта дӀадийкъар. Цу сагӀо чулаьцар дукха бераш дола, таро йоаца дезалаш; дегӀа могашал эшаеннараш; бойл бисараш; СВО доакъашхой; иштта шоай балха тӀа вахар хаьдача Ӏаьдала болхлой фусамашкара нах. «Цу наха гӀурба деш гӀо дар лоархӀаме хиларал совгӀа, уж дагабоахкилга, бицбенна боацилга дӀахайтар да», - белгалдир Мехкадаь зарбан болх лелабераша. Из деза, беркате гӀулакх боаггӀача боараме, цхьаккха кхоачамбоацараш юкъе доацаш дӀагӀоргдолаш, хьайбашта урс хьокхаш йола моттигаш лерттӀа кечам баь яр хьалххе. Мехкада ше вар цу гӀулакха тӀахьожам лоаттабеш.

«Укх дезача деношка цхьаккха саг юстара цависар да лоархӀаме. ГӀо дар – из цкъа дӀахьош болам бац, халача хьале кхаьчача наха массахана терко лоаттаеш хилар вайна юкъе доаржадар да», - белгалдир Мехкадас. Доккха баркал кхайкадир республикан кулгалхочо, Даьла духьа дӀахьош долча сагӀан юкъе дакъа мел лаьцарашта. Къаьстта теркалдир Федераце Совета сенатор волча Хамченаькъан Билана, Паччахьалкхен Дума депутат волча БӀарахой Бек-хана цу доккхача диканна юкъе лоархӀаме дакъа лацар.

Ид аль – Фитр яхача «Мехка сагӀан» боламо еррига республика чулаьцар. Дукхача наьха дог хьаьстар, Мархий деношка сагӀа декъаш. Мехкадас Келаматанаькъан Махьмуд-Ӏаьлас юкъебаьккхача «Мехка сагӀа» яхача боламо 4,5 эзар совгӀа дезал чулаьцар. Тайп-тайпарча кхачах кийчдаь тӀормигаш дӀадийкъар наха юкъе. Цу юкъе яр хурмаш, чай, дуга, шекар, хьоар, даьтта, дулх. 3,5 эзар совгӀа тӀормигаш дар эггара хьалха дӀадекъа кийчдаь хиннараш; бакъда, Мехкадас кхалений цхьаккха моттиг юстара юсаргйоацаш дӀахьо сагӀа, аьнна, кхы а дӀашердир из.

Къаьстта йоккха терко йир могаш боацарашта, да дӀаваьнна бисарашта, ха яхача, цхьаь бахача боккхача наха. Республикерча кхаленашка гаьна яда юрташ а тӀехьа юстара ца юташ, массайолча шахьарашкарча, юрташкарча нахага дӀакхоачийташ дӀадихьар из доккха сагӀа. Массехк шу хьалха дӀадоладаь из беркате гӀулакх, тахан беррига мохк юкъелоацаш, дукхача адамий дегаш хьоасташ, терко еш дӀахьош да.

Республикан хьалха латтача Келаматанаькъан Махьмуд-Ӏаьлас дӀагойтар, кулгалхой, хьакимаш шоай балхара декхараш кхоачашдара тӀехьа латтарал совгӀа, нахаца къахетаме, терко еш, дог хьаста хьожаш, гӀо де кийча болаш болга. Наьха дегаш хьоасташ дола доккха цӀайш да ГӀалгӀай мехка оттараш, динцара деза денош долча хана. Новкъостал эшараш дагалоацаш, Даьла духьа дер хьалха оттадеш сагӀа доаккхаш, массабараш цу беркатеча хӀаманна тӀахьехаш, Даьла раьза волча наькъ тӀа бехаш дола цӀайш даь дӀачӀоагӀдир уж хоза денош ший мехках дог лазаш волча кулгалхочо Келаматанаькъан Махьмуд-Ӏаьлас!